བུད་མེད་ལྷན་ཚོགས་ཀྱི་རྒྱུན་ལས་གསར་འདེམས་བྱས་འདུག

དེ་ཡང་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་༡༢ པ་མཇུག་བསྒྲིལ་ནས་གྲོས་ཆོད་ཁག་ཅིག་བཞག་ཡོད་པ་དང་། རྒྱུན་ལས་གསར་འདེམས་བྱས་ཡོད་པ་རེད། ཟླ་༥ པའི་ཚེས་༡༡ ནས་ཉིན་གྲངས་༦ རིང་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་༡༢ པ་དེ་འཚོགས་ནས་རྒྱུན་ལས་༡༡ གསར་འདེམས་བྱས་ཡོད་པ་དང་། ཚོགས་གཙོ་སྒྲོལ་མ་དབྱངས་ཅན་དང་ཚོགས་གཞོན་སྐལ་བཟང་གཡུ་སྒྲོན། དྲུང་ཆེ་ཚེ་རིང་ཆོས་འཛོམས་བཅས་ནི་སྐབས་སྔོན་མའི་རྒྱུན་ལས་བསྐྱར་དུ་འདེམས་ཐོན་བྱུང་ཡོད་པ་རེད། ཚོགས་ཆེན་ཐོག་གྲོས་ཆོད་ཁག་༡༠ བཞག་ཡོད་འདུག་པ་དང་། དེའི་ཁོངས་སུ་བུད་མེད་ལྷན་ཚོགས་ཀྱིས་ཟླ་༣ པའི་ཚེས་༡༢ ནི་འགྱུར་བ་མེད་པའི་ཐོག་ནས་བོད་ཀྱི་བུད་མེད་སྒེར་ལངས་ཉིན་མོར་སྲུང་བརྩི་ཞུ་རྒྱུ་དང་། དེ་བཞིན་༧གོང་ས་མཆོག་གི་སྐུ་ཕྱ། བོད་ནང་གི་ཛ་དྲག་གནས་སྟངས་ཐོག་གི་ལས་འགུལ། བོད་མིའི་མི་འབོར་འཕེལ་རྒྱས་དང་འབྲེལ་བའི་ལས་གཞི། དབུ་མའི་ལམ་གྱི་སྲིད་ཇུས་གོ་རྟོགས་སྤེལ་ཕྱོགས། དབུས་ས་གཉིས་བར་འབྲེལ་ལམ་གཏིང་ཟབ་ཏུ་གཏོང་རྒྱུ། བོད་ཀྱི་སྐད་ཡིག་སྲུང་སྐྱོབ་སོགས་ཀྱི་ཐད་ལ་གྲོས་ཆོད་བཞག་ཡོད་པ་རེད་འདུག ཐེངས་འདིའི་ཚོགས་ཆེན་ཐོག་ས་གནས་ཡན་ལག་ཁག་༣༧ ནས་ཚོགས་མི་༡༩༢ ཀྱིས་མཉམ་ཞུགས་བྱས་ཡོད་པ་རེད་འདུག །