བོད་ཀྱི་སྨན་རྩིས་ཁང་དབུ་བརྙས་ཏེ་ལོ་༡༠༢ འཁོར་བའི་མཛད་སྒོ།

ཟླ་འདིའི་ཕྱི་ཚེས་༢༨ ཉིན་དྷ་ས་བོད་ཀྱི་སྨན་རྩིས་ཁང་གི་ཚོགས་ཁང་དུ། རྒྱལ་ས་ལྷ་སར་༧རྒྱལ་མཆོག་སྐུ་ཕྲེང་༡༣ པས་སྨན་རྩིས་ཁང་གསར་འཛུགས་བྱས་ནས་ལོ་ངོ་༡༠༢ དང་། བཙན་བྱོལ་དུ་འབྱོར་རྗེས་དྷ་སར་༧རྒྱལ་མཆོག་སྐུ་ཕྲེང་༡༤ པས་བསྐྱར་གསོ་གནང་ནས་ལོ་ངོ་༥༧ འཁོར་བའི་དུས་དྲན་མཛད་སྒོ་རུ་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གི་གཙོས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། ༧སྐུ་བཅར་སྨན་པ་རྣམ་པ། གཞུང་འབྲེལ་དང་གཞུང་འབྲེལ་མ་ཡིན་པའི་སྐུ་ཚབ་རྣམ་པ། སྨན་རྩིས་ཁང་གི་འགན་འཛིན་རྣམ་པ་དང་དགེ་ལས་སློབ་ཕྲུག་བཅས་ཁྱོན་མི་གྲངས་༢༠༠ ལྷག་ཅིག་འཛོམས་འདུག

དེ་ཡང་མཛད་སྒོའི་ཐོག་མར་བོད་ཀྱི་གཞས་སྣ་འཁྲབ་སྟོན་ཁག་ཅིག་གཟུགས་འབུལ་དང་། དེ་རྗེས་དྷ་ས་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་གིས་ལས་བསྡོམས་སྙན་སྒྲོན་ལས། "སྨན་རྩིས་ཁང་གི་ལས་འགན་གལ་ཆེ་ཤོས་ནི་༧གོང་ས་མཆོག་གི་སྐུའི་འཕྲོད་བསྟེན་གྱི་ཞབས་ཞུ་ལས་ལྷག་པ་མེད་སྟབས། རྒྱུད་གཞུང་མན་ངག་དང་མཐུན་པར་སྦྱོར་འབུལ་ཞུ་མུས་ཡིན་ཁར་རྩིས་རིག་སྡེ་ཚན་ནས་སྐུའི་དགུང་སྐེག་འཕྲོད་སྦྱོར་སོགས་འབུལ་ལམ་ཆད་མེད་ཞུ་བཞིན་ཡོདཔ་དང་། ད་ལྟའི་ཆར་ངོ་བོ་དང་ལས་འགན་གྱི་ཐོག་ནས་སྨན་རྩིས་ཁང་དུ་འཛིན་སྐྱོང་ཁོངས་སྡེ་ཚན་༡༡ དང་། རིག་གཞུང་ཁོངས་སྡེ་ཚན་༡༡ བཅས་ཁྱོན་སྡེ་ཚན་༢༢ དང་། འཛིན་སྐྱོང་ཚགས་ཚུད་དང་མཉམ་རུབ་ཆེད་སྒྲིག་གསལ་ལས་ཀའི་ངོ་བོའི་ཆ་ནས་དབང་ཚད་བགོ་འགྲེམས་བྱས་པའི་ཚོགས་ཆུང་ཁག་༩ བཅས་ཡོད་པ་དང་། དེའི་ཁྲོད་ནས་སྨན་པ་གཙོ་བོ་ཚོགས་གཙོ་ཡིན་པས་ཆེས་མཐོའི་སྨན་རྩིས་ལྷན་ཚོགས་ནི་ཚོགས་ཆུང་གལ་ཆེ་ཤོས་དེ་ཡིན་ཞིང་། མིའི་ནུས་ཤུགས་གོང་འཕེལ་སྡེ་ཚན་ཁོངས་ལས་བྱེད་དང་། ལས་མི། སློབ་མ་བཅས་ཀྱི་གྲངས་ཀའི་རྣམ་གྲངས་ནི། སྐྱེས་པ་སྨན་པ་༦༩ དང་བུད་མེད་སྨན་པ་༤༨། ཆོད་གན་སྨན་པ་༦། སྐར་རྩིས་པ་སྐྱེས་པ་༨ དང་བུད་མེད་༧། ཉམས་གསོག་སྨན་པ་སྐྱེས་པ་༢༤ དང་བུད་མེད་༢༤། ཉམས་གསོག་སྐར་རྩིས་པ་སྐྱེས་པ་༣ དང་བུད་མེད་༣། སྐར་རྩིས་སློབ་མ་བུ་༡༠ དང་བུ་མོ་༡༤། འཛིན་སྐྱོང་ལས་བྱེད་སྐྱེས་པ་༡༧༢ དང་བུད་མེད་༡༥༡། འཛིན་སྐྱོང་ཆོད་གན་ལས་བྱེད་སྐྱེས་པ་༤༦ དང་བུད་མེད་༡༦། ལས་མི་༤༨ སྐྱེས་པ་༤༨ དང་བུད་མེད་༤༦། ཚོད་ལྟའི་ལས་བྱེད་སྐྱེས་པ་༢ དང་བུད་མེད་༣ བཅས་ཁྱོན་སྐྱེས་པ་༤༣༠ དང་བུད་མེད་༣༥༡ ཡོད་འདུག་པ་དང་། གཞན་ཡང་དམིགས་བསལ་དགོས་མཁོ་ཅན་རྣམས་ལ་ཟླ་རེར་ཧིན་སྒོར་འབུམ་༣༥ སྨན་རིན་ཕྱེད་བཅག་གི་ཐོག་ནས་ཞབས་ཞུ་སྒྲུབ་ཀྱི་ཡོད་ལ།  ནད་རིགས་སྔོན་འགོག་དང་། རྒྱ་ཡིག་སྡེ་ཚན། སྦེང་ལོར་མཐོ་སློབ། སྨན་དང་ཐོན་སྐྱེད་སྤུས་ཚད་སྟངས་འཛིན་ཚོགས་ཆུང་། བཙོ་ཐལ། སེམས་ཁམས་འཕྲོད་བསྟེན། ཕྱི་རྒྱལ་ཁག་ཏུ་སྐོར་བསྐྱོད་ཀྱི་ལས་རིམ། ནད་རིགས་བྱེ་བྲག་ཐོག་འོད་ལྡེར་བཟོ་རྒྱུ། སྨན་རྩིས་ཐོན་སྐྱེད་སོགས་བྱེད་ཡོད། "ཅེས་གསུངས་སོང་།

དེ་རྗེས་སྨན་རྩིས་ཁང་དཔེ་དེབ་ཞིབ་འཇུག་དང་དཔེ་སྐྲུན་སྡེ་ཚན་གྱིས་བཏོན་པའི་དཔེ་དེབ་ཁག་ཅིག་དབུ་འབྱེད་གྲུབ་མཚམས། ལས་བྱེད་ཞབས་ལོ་༣༠ དང་༢༠ སོན་པ་རྣམས་གཟེངས་བསྟོད་བྱ་དགའ་བསྩལ་སོང་བ་དང་། སློབ་ཐོན་སྨན་པ་དཀའ་བཅུ་པ་དང་སྨན་རྩིས་སློབ་མའི་ཡིག་རྒྱུགས་ཀྱི་གྲུབ་འབྲས་ཡང་རྩེར་སོན་པ་རྣམས་ལ་འཕྲོད་བསྟེན་བཀའ་བློན་གྱིས་ཕྱག་འཁྱེར་བསྩལ་སོང་། གཞན་ཡང་སྨན་རྩིས་ཁང་གི་སྨན་པ་གཙོ་བོ་༧སྐུ་བཅར་སྨན་རམས་པ་ཚེ་དབང་རྟ་མགྲིན་གྱིས་༧སྐུའི་བླ་སྨན་པ་ཟུར་པ་སྨན་པ་ཡེ་ཤེས་དོན་ལྡན་ལ་རྒྱ་གར་གཞུང་གི་༢༠༡༨ ལོའི་པདྨ་ཤྲཱི་གཟེངས་རྟགས་ཀྱི་ཆེ་བསྟོད་འབུལ་བར་ཡི་རངས་བསྔགས་བརྗོད་དང་དགའ་བསུའི་འཚམས་འདྲི་ཞུ་རྗེས་འཕྲོད་བསྟེན་བཀའ་བློན་གྱིས་ལེགས་གསོལ་ཕྱག་རྟགས་ཕུལ་སོང་།

དེ་རྗེས་མཛད་སྒོའི་སྐུ་མགྲོན་གཙོ་བོ་དང་སྨན་རྩིས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་གིས་གསུང་བཤད་གནང་དོན། "དུས་སྐབས་འདི་ལ་གསོ་རིག་གི་གནས་བབས་དང་གསོ་རིག་རྒྱུན་འཛིན་དལ་སྤེལ་འགྲོ་བར་ཞབས་འདེགས་ཞུ་མཁན་དང་ཕྱར་བ་གྲུ་འདེགས་གནང་མཁན་གྱི་སྒྲིག་འཛུགས་གཙོ་བོ་དེ་སྨན་རྩིས་ཁང་ཡིན་ཞིང་། དེ་ནི་བགྲེས་ཡོལ་ལ་ཕེབས་མཁན་དང་ཞབས་ལོ་༣༠ དང་༢༠ སོན་པ་སོགས་ལས་བྱེད་རྒན་པ་རྣམས་ཀྱི་འབད་བརྩོན་ལས་བྱུང་ཡོད་པ། དེ་བཞིན་༧སྐུའི་བླ་སྨན་པ་ཟུར་པ་སྨན་པ་ཡེ་ཤེས་དོན་ལྡན་ལ་པདྨ་ཤྲཱིའི་གཟེངས་རྟགས་ཐོབ་པར་རང་རིགས་དགའ་སྤོབས་སྐྱེ་འོས་པ་ཞིག་ཡིན་པ།  སྨན་རྩིས་ཁང་ནས་ཉམས་ཐག་དང་ནད་མནར་སོགས་དགོས་ངེས་རྣམས་ལ་སྨན་སྦྱིན་གནང་བ་དང་། ༧གོང་ས་མཆོག་གི་ལམ་སྟོན་བཞིན་ནད་རིགས་སྔོན་འགོག་ཐོག་ཤུགས་སྣོན་བྱས་ནས་དེ་འབྲེལ་གྱི་དཔེ་དེབ་མང་པོ་དུས་ཐོག་ཏུ་ཁྱབ་སྤེལ་བྱེད་ཐུབ་པ་བྱུང་བ་བཅས་ལ་བསྔགས་བརྗོད་ཡོད་སྐོར། དེ་བཞིན་སྨན་རྩིས་ཁང་དབུ་བཙུགས་ནས་ད་བར་སྨན་པ་དཀའ་བཅུ་པ་དང་སྨན་རམས་པ་སོགས་མང་དག་ཅིག་སློབ་ཐོན་བྱུང་ནས་དེ་དག་གིས་བཙན་བྱོལ་བོད་པའི་སྤྱི་ཚོགས་ནང་ཞབས་འདེགས་མི་དམན་པ་སྒྲུབ་ཡོད་སྟབས་ཚང་མས་དགའ་མོས་བྱེད་ཀྱི་ཡོད་པའི་གནས་སྟངས་ཆགས་ཡོད་སྐོར་དང་། རིགས་གཅིག་ཕྱི་ལོགས་སུ་ཐོན་ནས་གསོ་རིག་རྒྱུན་འཛིན་ཁྱབ་སྤེལ་གྱི་ཐོག་ཕྱག་ལས་གནང་མུས་ཡིན་པ་བཅས་ལ་དགའ་སྤོབས་སྐྱེ་གཞི་དང་བསྔགས་བརྗོད་ཞུ་ཡུལ་ཡིན་པ་ལྟར་ཕྱིས་སུ་ཡང་དེ་ལྟར་ཤུགས་སྣོན་གནང་རྒྱུ་གལ་ཆེན་པོ་རེད།" ཅེས་གསུང་བ་བཅས།།