༢༠༡༨།༠༣།༢༦ཉིན་སྤེལ། "ང་ཚོ་བཙན་བྱོལ་ལ་གནས་པའི་རིང་ལ་ང་ཚོ་ནང་ཁུལ་གྱི་ཆབ་སྲིད་ལྟ་བུའི་འཁོར་ལོ་བསྐོར་བ་ཡིན་ན། ང་རང་ཚོ་ནུས་པས་མི་འདང་བ་གསལ་པོ་རེད།"ཅེས་སྤྱི་འཐུས་ཚོགས་གཙོས་གསུང་སོང་།
འདིོ་ཟླའི་ཕྱི་ཚེས་ ༢༤ཉིན། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་ཕྱི་ལོ་ ༢༠༡༨ ཟླ་ ༣ ཚེས་ ༡༤ རེས་གཟའ་ལྷག་པ་ཉིན་ནས་འགོ་འཛུགས་ཀྱིས་ཕྱི་ཚེས་ ༢༤ ཉིན་ལེགས་གྲུབ་བྱུང་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསུང་བཤད་གནང་དོན།
"ལས་རིམ་ནང་གཙོ་བོ་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་རྩིས་ལོ་ ༢༠༡༨།༢༠༡༩ ལོའི་སྔོན་རྩིས་རྒྱུན་གྲོན་དང་། དམིགས་བསལ། ཟུར་བཀོལ་བཅས་ཁྱོན་བསྡོམས་ས་ཡ་ཉིས་སྟོང་དྲུག་བརྒྱ་ལྷག་གྲོས་ཚོགས་འདིའི་ནང་གྲོས་གླེང་དང་། དེའི་ནང་ནས་ལས་ཁུངས་ཁག་གསུམ་ཙམ་གྱི་མཐའ་མའི་དངུལ་འབོར་བསྡོམས་ལ་འགྱུར་བ་ཕྱིན་པ་རེད་མ་གཏོགས་ཐོག་མའི་བཀའ་ཤག་གི་འཆར་འབུལ་གང་གནང་བ་དེའི་ཐོག་ནས་བཀའ་འཁྲོལ་གཏན་འབེབས་གནང་ཐུབ་ཡོད། "ཅེས་དང་།
གཞན། "དེ་བཞིན་གྲོས་ཚོགས་ནང་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་གྲོས་འཆར་གསུམ་བྱུང་ཡོད། གཞན་ཡང་སྐར་རྟགས་ཅན་གྱི་དྲི་བ་གསུམ་གྱི་ནང་ནས་གཅིག་ཕྱིར་འཐེན་བྱས་ནས་གཉིས་ཕེབས་ཐུབ་ཡོད། ཕྱོགས་མཚུངས་ཐུགས་སྣང་གཞན་སྐུལ་གྱི་གྲོས་འཆར་གཅིག་དང་། གྲོས་ཆོད་གྲོས་འཆར་གྱི་ནང་ནས་གལ་ཆེ་བ་ཞིག་བོད་ནང་གི་ཛ་དྲག་གནས་སྟངས་ཐོག་གདུང་སེམས་མཉམ་སྐྱེའི་གྲོས་འཆར་ཞིག་ཆགས་ཡོད། དེའི་ཐོག་བཀུར་འོས་སྤྱི་འཐུས་རྣམ་པ་ཡིན་ནའང་འདྲ། འཛིན་སྐྱོང་བཀའ་ཤག་ཐོག་ནས་ཆ་ཤས་བཞེས་རྒྱུ་སོགས་ཀྱི་ཐོག་ནས་བོད་ནང་གི་བོད་མིའི་ཛ་དྲག་གནས་སྟངས་དང་། རྒྱ་ནག་གི་ཆབ་སྲིད་བོད་ཐོག་འཛིན་བཞིན་པའི་ཐད་དཀའ་ངལ་གང་འཕྲད་ཀྱི་ཡོད་མེད། ཁོར་ཡུག་དང་། འགྲོ་བ་མིའི་ཐོབ་ཐང་། ཆོད་དད་རང་དབང་། སྐད་ཡིག་གི་གནས་སྟངས་བཅས་དེ་དག་གི་ཐོག་བགྲོ་གླེང་གང་ཙམ་སྔོན་མའི་གྲོས་ཚོགས་ནང་གདུང་སེམས་མཉམ་སྐྱེའི་གྲོས་འཆར་ཐོག་བགྲོ་གླེང་གནང་སྟངས་ལས་ད་རེས་གྲོས་ཚོགས་ཚོགས་ཐེངས་ལྔ་པའི་ཐོག་བགྲོ་གླེང་གི་གནས་ཚད་ཕྲན་བུ་བཟང་བ་ལྟ་བུ་ཕྱིན་པའི་ཚོར་སྣང་བྱུང་།" ཞེས་དང་།
དེ་མིན། "དེ་བཞིན་བཀའ་ཤག་གིས་གཞུང་འབྲེལ་གསལ་བཤད་ཐོག་གྲོས་ཆོད་འཇོག་ཐུབ་པ་བྱུང་ཡོད། དེ་བཞིན་ལས་དོན་གལ་ཆེ་བ་ཞིག་ཁྲིམས་བཟོའི་ལས་དོན་ཆགས་ཡོད། འོན་ཀྱང་གྲོས་ཚོགས་ཚོགས་དུས་ལྔ་པ་འདིའི་ཐོག་ནས་ཁྲིམས་བཟོའི་ལས་དོན་ཆེས་ཉུང་བའམ་འགའ་ཤས་མ་གཏོགས་མེད་པ་ཆགས་ཡོད། སྤྱི་ཁྱབ་རྩིས་ཞིབ་ལས་ཁུངས་ཀྱི་རྩིས་ཞིབ་ཀྱི་སྒྲིག་གཞི་ནང་བསྐྱར་བཅོས་གཅིག་ཐོན་ཐུབ་ཡོད། དེ་ནས་འདེམས་ལྷན་གྱི་སྒྲིག་གཞི་ནང་འཛིན་སྐྱོང་གི་བསྐྱར་བཅོས་གཅིག་འཁྱེར་ཡོད་པ་དེ་ཐོན་ཐུབ་མེད། དེ་བཞིན་འདིའི་ཐོག་ནས་བསམ་ཚུལ་ཞུ་རྒྱུ་ཞིག་ལ་འཛིན་སྐྱོང་ངོས་ནས་སྒྲིག་གཞི་བསྐྱར་བཅོས་འཁྱེར་དགོས་རྒྱུ་དེ་ཚོ་དགོངས་པ་གཟབ་བཞེས་གནང་དགོས་རྒྱུ་ཆགས་ཀྱི་འདུག" ཅེས་དང་།
དེ་བཞིན། "ལས་རིམ་གལ་ཆེ་ཤོས་གཅིག་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གཞུང་འབྲེལ་གསལ་བཤད་དེ་ཆགས་ཡོད་རེད། དེའི་ཐོག་ལ་སྤྱི་འཐུས་མང་པོ་ཞིག་གིས་ཆ་ཤས་བཞེས་ནས། གནད་དོན་མང་པོ་ཞིག་གླེང་སློང་གནང་ཡོད་རེད། དེ་ཡིན་དུས་དེའི་ཐོག་ནས་འཛིན་སྐྱོང་གི་ལས་དོན་གནང་ཕྱོགས་ཡིན་ནའང་འདྲ། ཆབ་སྲིད་ཀྱི་ལྟ་གྲུབ་འཛིན་སྟངས་ཟེར་ན་འདྲ། གང་ལྟར་གནས་ཚུལ་དེའི་ཐོག་ནས་མ་འོངས་པར་ལག་བསྟར་གནང་བའི་སྐབས་སུ་དོན་དང་མཐུན་པ་གནད་དུ་སྨིན་པ་ཞིག་ཡོང་ཐུབ་རྒྱུ་ཆབ་སྲིད་ཀྱི་གནས་སྟངས་ཡིན་ན་འདྲ། འཛིན་སྐྱོང་གི་ལས་དོན་ཡིན་ནའང་འདྲ་དེ་འདྲ་ཡོང་ཐུབ་རྒྱུར་གྲོས་ཚོགས་ཀྱི་འཐུས་མི་རྣམ་པས་དགོངས་འཆར་ཕུལ་བ་དང་། འཛིན་སྐྱོང་བཀའ་ཤག་གིས་དགོངས་བཞེས་གནང་ཕྱོགས་ཀྱི་ཐོག་ནས་ལས་རིམ་དེ་དག་ཡག་པོ་བྱུང་སོང་ཞེས་དེ་གཅིག་ཞུ་རྒྱུ་ཡིན།" ཞེས་དང་།
དེ་ཡང་ཚོགས་གཙོས་མུ་མཐུད་དུ་གསུང་བར། "དེ་བཞིན་ལས་རིམ་སྐྱོང་པའི་སྐབས་སུ་བཀུར་འོས་སྤྱི་འཐུས་རྣམ་པས་ཆ་ཤས་བཞེས་སྟངས་ཡིན་ནའང་འདྲ། དེ་བཞིན་འཛིན་སྐྱོང་བཀའ་ཤག་གི་ཐོག་ནས་ཆ་ཤས་བཞེས་སྟངས་ཡིན་ནའང་འདྲ། ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ལ་སྔར་ལས་ཐུགས་སྣང་ཆེ་བ་གནང་གི་ཡོད་པ་དང་། དེ་བཞིན་ཡར་རྒྱས་ཀྱི་རྣམ་པ། བགྲོ་གླེང་སོགས་ཀྱི་གནས་ཚད་ཡག་ཏུ་འགྲོ་གི་ཡོད་པའི་ཚོར་སྣང་བྱུང་། ཡིན་ན་ཡང་གྲོས་ཚོགས་ཚོགས་ཐེངས་ལྔ་པ་འདིའི་ཐོག་སྒེར་སོ་སོ་དཀར་འདོན་ཡོང་ཐབས་ལ་བཅའ་ཁྲིམས་ལུང་འདྲེན་གནང་རྒྱུ་དང་། ཚོགས་སྡེ་སྒེར་སོ་སོ་ནས་ཡིག་ཆུང་སྙན་སྒྲོན་གནང་རྒྱུ། དེ་ག་ནང་བཞིན་གྱི་སོ་སོ་དང་འབྲེལ་བའི་ཐོག་ནས་ཡིག་ཆ་སྙན་སྒྲོན་གནང་མཁན་དེ་འདྲའི་རིགས་ཤིག་བྱུང་སོང་། དེ་ག་ནང་བཞིན་ཚིག་མཚོན། སྤྱི་འཐུས་ནང་ཕན་ཚུན་ལ་ཚིག་མཚོན་བཤད་རེས་བྱེད་རྒྱུ་དེ་འདྲ་ཤུགས་ཆེན་པོ་ཐོན་སོང་བསམ་པའི་ཚོར་སྣང་བྱུང་། འབྱུང་འགྱུར་དེའི་རིགས་མི་ཡོང་བ་གཙོ་དོན་གནང་དགོས་རྒྱུ་དེ་གལ་ཆེན་པོ་འདུག རྒྱུ་མཚན་ག་རེ་རེད་ཟེར་ན། ང་ཚོ་སྤྱི་པའི་སྤྱི་མི་ཞིག་ཆགས་བསྡད་ཡོད་རེད། དེའི་ཐོག་ནས་སྒེར་ལས་སྤྱི་པའི་སྒྲིག་འཛུགས་དང་། སྤྱི་པའི་ལས་དོན་ཐོག་ལ་གལ་ཆེ་བརྩི་མཁན་ཡིན་དུས་དེ་ཚོའི་ཐོག་ལ་ཏོག་ཙམ་དགོངས་པ་བཞེས་དགོས་གལ་ཆེན་པོ་འདུག་ཅེས་ཞུ་འདོད་བྱུང་།"ཞེས་དང་།
ད་དུང་། "དེ་ནས་བཀའ་མོལ་གསུང་བའི་སྐབས་སུ་ཡིན་ན་ཡང་། ཚོགས་གཙོ་ལ་ཁ་ཕྱོགས་ནས་གསུང་དགོས་པ། དེ་ཡང་སྐད་ཡིག་གཞན་བེད་སྤྱོད་གཏོང་དུས་ཚོགས་གཙོ་ལ་བཀའ་འཁྲོལ་ཞུ་དགོས་རྒྱུ། གཞན་ཡང་གྲོས་ཚོགས་ཀྱི་ཚོགས་མི་རེད། ཟུར་ཉན་པ་རེད། ལས་བྱེད་རེད། དེ་ཚོ་མིང་འབོད་གནང་དགོས་དུས་ཚོགས་གཙོ་ལ་བཀའ་འཁྲོལ་ཞུ་དགོས་རྒྱུ། ལས་རིམ་རྣམ་གཞག་སྟོན་པ་དེ་ཚོ་ཚད་དང་ལྡན་པ་ཞིག་ཡོང་ཐུབ་དགོས་རྒྱུ་ལ་ད་དུང་དགོངས་བཞེས་གནང་དགོས་ཀྱི་འདུག དེ་བཞིན་ཚོགས་སྡེ་བྱེ་བྲག་པ་རེད། སྒེར་སོ་སོའི་སྤྱོད་ཚུལ་ཐོག་ལ་གླེང་སློང་བྱེད་མི་དགོས་པ་གཙོ་བོ་གཙོ་འདོན་གནང་དགོས་རྒྱུ་དེ་གལ་ཆེན་པོ་རེད། རྒྱུ་མཚན་གང་ཡིན་ཟེར་ན། ང་ཚོ་གྲོས་ཚོགས་ཀྱི་སྡིངས་ཆ་འདི་གཙོ་བོ་བོད་སྤྱི་པ་དང་བོད་མི་ས་ཡ་དྲུག་གི་ཁེ་ཕན་དང་འབྲེལ་བ་ཆགས་བསྡད་ཡོད་རེད། དེ་འདྲའི་དོན་གནད་ཁག་ལ་བགྲོ་གླེང་དང་དུས་ཚོད་མང་བ་གཏོང་ཐུབ་པ་ཡིན་ན། འཕྲལ་ཕུགས་གཉིས་ཀ་ལ་ཕན་ཐོགས་ཆེ་བ་ཡོང་བ་དང་། དེ་ན་གྲོས་ཚོགས་ཀྱི་ཆེ་མཐོང་ཡིན་ནའང་འདྲ། གྲོས་ཚོགས་ཀྱི་སྐད་ཡིག་ཡིན་ནའང་འདྲ། གནས་ཚད་མཐོ་རུ་འགྲོ་རྒྱུ་རང་བཞིན་གྱིས་ཆགས་ཀྱི་འདུག དེའི་ཐོག་ལ་གྲོས་ཚོགས་ཀྱི་ཚོགས་མི་ཚང་མས་དགོངས་པ་ཟབ་བཞེས་དགོས་པ་དེ་གལ་ཆེན་པོ་རེད་འདུག་ཅེས་དེ་གཅིག་ཞུ་འདོད་བྱུང་།" ཞེས་དང་།
དེ་བཞིན། "བོད་ནང་གི་བོད་མི་རྣམས་རེད། བཙན་བྱོལ་ནང་གི་བོད་མི་རྣམས་རེད། ལྷག་པར་དུ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རེ་དང་ཡིད་ཆེས་གནང་བ་དང་། བོད་མི་སྒྲིག་འཛུགས་ལ་ཆེ་མཐོང་དང་ནུས་པ་ཞིག་རང་བཞིན་གྱིས་བསླེབས་བསྡད་ཡོད་རེད། དེ་བཞིན་ལོ་རྒྱུས་ཀྱི་བྱུང་རབས་དང་འབྲེལ་བའི་ཐོག་ནས། གལ་ཆེའི་སྒྲིག་འཛུགས་ཀྱི་རང་བཞིན་ཞིག་ཆགས་བསྡད་དུས། དེ་བཞིན་བོད་མི་རིགས་ཀྱི་ཆོས་དང་། རིག་གཞུང་། སྐད་ཡིག གོམས་གཤིས་དེ་དག་ཚང་མར་རྒྱལ་སྤྱིའི་ནང་ནས་ཆེ་མཐོང་དང་། དམིགས་བསལ་ཐུགས་སྣང་གནང་སའི་གཞི་ཆགས་ཡོད། དེ་དག་གི་ནུས་པའི་འབྱུང་ཁུངས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་། དེ་བཞིན་ཁོང་གི་ཐུགས་བསྐྱེད་ལ་བརྟེན་ནས་བྱུང་བ་ཡིན་དུས། ང་ཚོས་དུས་རྒྱུན་དུ་ནས་ལས་དོན་གང་བརྩམ་པ་ཡིན་ནའང། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ལ་བསམ་ཤེས་ཞུ་ཐུབ་དགོས་པ། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རེ་གང་གནང་གི་ཡོད་པ་བཞིན། སྒྲིག་འཛུགས་ཀྱི་ལས་ཀྱི་སྣེ་མོར་གཏོགས་པ་ཡིན་ནའང་འདྲ། བོད་རྒྱ་ཆེའི་མང་ཚོགས་ཡིན་ནའང་འདྲ། བཀའ་བཞིན་བསྒྲུབ་པའི་མཆོད་པས་མཉེས་པ་ཞུ་ཐུབ་དགོས་རྒྱུ་དེ། ང་ཚོ་བོད་མི་ཚང་མའི་དམིགས་ཡུལ་དང་ལས་འགན་གལ་ཆེ་ཤོས་ནང་གི་ཆེ་ཤོས་ཤིག་ཆགས་ཀྱི་འདུག"ཅེས་དང་།
ཡང་། "༸གོང་ས་༸སྐྱབས་མགོན་ཆེན་པོ་མཆོག་གིས་དུས་རྒྱུན་ནས་བཀའ་སློབ་གསུང་བསྡད་རྒྱུ་དེ། ང་ཚོ་ཆོལ་ཁ་ཆོས་ལུགས་དང་བཅས་པ་མཐུན་ལམ་དེ་ཆབ་སྲིད་ཀྱི་ཐོག་ནས་ཡིན་ནའང་འདྲ། སྤྱི་ཚོགས་ཀྱི་གནས་སྟངས་ཐོག་ནས་ཡིན་ནའང་འདྲ། གལ་ཆེ་བ་གཅིག་ཡོངས་གྲགས་རྩིས་བསྡད་ཡོད་པ་རེད། དེ་ཡིན་དུས། ང་ཚོས་ཞབས་རིམ་དང་དགུང་སྐེག་ནང་ནས་ཞབས་རིམ་ཡག་ཤོས་དེ་ང་ཚོའི་ཆིག་སྒྲིལ་གྱི་ནུས་པ་དེ་འགྱུར་བ་མེད་པ་དང་ལྕགས་ཀྱི་གོང་བུ་ནང་བཞིན་ཟེར་ན་མི་འདུག གང་ལྟར་དེ་འདྲ་ཞིག་བོད་མི་ཚང་མས་བསམ་བློ་བཏང་ནས་བཅངས་དགོས་རྒྱུ་དེ་གལ་ཆེན་པོ་འདུག་ཅེས་དེ་གཅིག་ཞུ་རྒྱུ་ཡིན།"ཞེས་དང་།
དེ་ལྟར། "ང་ཚོ་བཙན་བྱོལ་ལ་གནས་པའི་རིང་ལ་ང་ཚོ་ནང་ཁུལ་གྱི་ཆབ་སྲིད་ལྟ་བུའི་འཁོར་ལོ་བསྐོར་བ་ཡིན་ན། ང་རང་ཚོ་ནུས་པས་མི་འདང་བ་གསལ་པོ་རེད། ནུས་པས་མི་འདང་བ་ཟེར་དུས། གང་ཟག་སྒེར་གཅིག་གིས་སྒེར་གཅིག་ལ་ཁ་གཏད་གཅོག་མི་ཐུབ་པའི་གནས་སྟངས་མ་རེད། ང་རང་ཚོ་བཙན་བྱོལ་གྱི་གནས་སྟངས་ཚང་མ་གཞན་དབང་སྟབས་བསྟུན་ཉག་གཅིག་ཆགས་བསྡད་ཡོད་པ་རེད། དེ་བཞིན་མི་འབོར་གྱི་ཐོག་ནས་ཡིན་ནའང་འདྲ། དཔལ་འབྱོར་གྱི་ཐོག་ནས་ཡིན་ནའང་འདྲ། སྤྱི་ཚོགས་ཀྱི་གནས་བབ་ཚང་མའི་ཐོག་ནས་ཡོང་དཀའ་བ་ཆགས་ཀྱི་ཡོད། དེ་ཡིན་དུས་བོད་མི་ཚང་མ་ནུས་པ་མཉམ་སྤུངས་དང་འགན་འཁུར་མཉམ་བཞེས་ཡོང་ཐུབ་རྒྱུ་ལ་ཚང་མས་འབད་བརྩོན་གནང་དགོས་ཀྱི་འདུག་ཅེས་ཞུ་རྒྱུ་ཡིན།
དེ་ནས་སྤྱི་ཚོགས་ནང་ལ་འགན་འཁུར་མཁན་ཡིན་ནའང་འདྲ། བོད་མི་མང་ཚོགས་ཡིན་ནའང་འདྲ། སྤྱི་ཚོགས་དྲ་རྒྱའི་ནང་ལ་འགན་འཁུར་མེད་པའི་གཏམ་བཤད་འདྲ་མིན་གནང་རྒྱུ་དང་། དེ་བཞིན་རྩོམ་འབྲི་རྒྱུ་ལ་སོགས་པ་འདྲ་མིན་གནང་རྒྱུ་དེ་ཚོའི་གྲས་དེར་དགོངས་པ་བཞེས་དགོས་རེད་བསམ་གྱི་འདུག"ཅེས་འཇུག་སྡོམ་གསུང་བཤད་གནང་སོང་བ་བཅས།།
