བོད་རྔ་བར་དཀོན་པེ་ལགས་ཀྱིས་རང་ལུས་མེར་བསྲེགས་གནང་སྟེ་སྐུ་གྲོངས་འདུག

དེ་ཡང་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་དང་བློ་བཟང་ཡེ་ཤེས་གཉིས་ཀྱིས་ཕྱི་ལོ་༢༠༡༧ ཟླ་༡༢ ཚེས་༢༥ ཉིན་ལ་འདི་ག་གསར་ཁང་དུ་བཏང་གནས་ལ་གཞིགས་ན། དེ་གར་འབྱོར་བའི་བརྙན་ཐུང་ནང་ཁོང་གི་སྐུ་གཟུགས་ཡོངས་རྫོགས་མེ་ལྕེས་བཏུམས་ནས་རྒྱུགས་བཞིན་འདུག་ལ་ཉེ་འཁྲིས་སུ་ཡོད་པའི་བུད་མེད་ཅིག་གིས་ ; རྒྱལ་དབང་བསྟན་འཛིན་རྒྱ་མཚོ་ཚང་། ཁྱེད་ཀྱི་ཐུགས་རྗེས་གཟིགས་དགོས་; ཟེར་བཞིན་ངུ་ངག་གི་ཀློང་ནས་སྐད་འབོད་གསོལ་འདེབས་གནང་བཞིན་པ་གོ་ཐུབ། དེ་མིན་སྐབས་དེར་ཁོང་གིས་སྐད་འབོད་ཅི་ཞིག་གནང་ཡོད་མེད་ཀྱི་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད། དེ་མ་ཐག་ཉེན་རྟོག་པ་སླེབས་ཏེ་ལུས་སྟེང་དུ་འབར་གྱིན་པའི་མེ་བསད་པ་དང་འབར་ཁམས་སུ་འཁྱེར་ནས་མཚན་གྱི་ཆུ་ཚོད་༡༠ ་ཙམ་ལ་སྨན་ཁང་དུ་སླེབས་ཡོད་པ་རེད།

འོན་ཀྱ྄ང་ཕྱི་ཚེས་༢༤ ཉིན་གྱི་ཞོགས་ཀའི་ཆུ་ཚོད་༥ ཙམ་ལ་སྐུ་གྲོངས་ཡོད་འདུག རྒྱ་ནག་གཞུང་གིས་འབར་ཁམས་སུ་རུས་ཐལ་ལེན་པར་ཡོང་དགོས་སྐོར་བཤད་པ་ལྟར་སོང་བར་དཀོན་པེའི་རུས་ཐལ་རེད་ཟེར་བ་ཞིག་ནང་མི་ལ་སྤྲད་ཡོད་པ་དང་།  ད་ལྟ་ཤུལ་ལུས་ནང་མི་ཉེ་འབྲེལ་ཚོས་སྐུ་གཤེགས་དཔའ་བོ་ཁོང་གི་རྗེས་འཇུག་སྒྲུབ་བཞིན་ཡོད་འདུག  ཁོང་གི་ཕ་རྒྱ་སྐྱབས་ལ་རྒྱ་གཞུང་གིས་དཀོན་པེའི་ཆེད་དུ་སྨན་རིན་སྒོར་ཁྲི་ཁ་ཤས་སོང་ཚུལ་བཤད་ནས་འབར་ཁམས་སུ་འཛིན་བཟུང་བཀག་ཉར་བྱས་ཡོད་འདུག

སྐུ་གཤེགས་དཀོན་པེ་ལགས་ནི་རྒྱ་གཞུང་གིས་དབྱེ་བགོས་བྱས་པའི་རྔ་པ་བོད་རིགས་རང་སྐྱོང་ཁུལ་རྔ་པ་རྫོང་གཅའ་ཡུལ་ཚོའི་ཕྱུགས་ལས་གོང་མ་ནས་ཡིན་ཡང་། དེང་སྐབས་རྨེའུ་རུ་མའི་རུ་ཆེན་གཉིས་པའི་རྭ་བ་ཚང་གི་བུ་མོ་སྐལ་བཟང་ལྷ་མོའི་མག་པར་སླེབས་ནས་ལོ་གཅིག་ལྷག་འགོར་ཡོད་འདུག ཁོང་གི་མཚན་ལ་དཀོན་པེ། རང་ལོ་༣༠ ཡས་མས། ཕ་མིང་ལ་རྒྱ་སྐྱབས། མ་མིང་ལ་འཕྲིན་ལྡོག   ཁོང་ལ་སྤུན་གཉིས་དང་སྲིང་མོ་གསུམ་ཡོད་པ་ལས་སྤུན་གཅིག་རྔ་པ་ཀིརྟི་དགོན་དུ་གྲྭ་པ་བྱས་ནས་ཡོད་འདུག 

དཀོན་པེ་ལགས་ནི་ཆུང་ཆུང་སྐབས་རྔ་པ་ཀིརྟི་དགོན་དུ་གྲྭ་པ་བྱས་ནས་རྗེས་སུ་སྐྱ་སར་བབ་པ་ཞིག་ཡིན་འདུག ཕྱི་ཚེས་༢༤/༢༥ གཉིས་ལ་རྔ་པ་རྫོང་ཐོག་གི་བོད་པའི་ཟ་ཁང་དང་ཚོང་ཁང་ཆ་ཚང་སྒོ་བརྒྱབ་ནས་ཁོང་དང་གི་ཁོང་གི་ནང་མི་ཚོར་གདུང་སེམས་མཉམ་བསྐྱེད་དང་སྐྱིད་སྡུག་མཉམ་མྱོང་གནང་བཞིན་ཡོད་འདུག་པ་བཅས། །

གསར་འགོད་པ་བསྟན་འཛིན་ནོར་རྒྱས།