20
Fri, Sep

ཆབ་སྲིད་བཙོན་པ་ནམ་མཁའ་བྱམས་ལགས།

བོད་ཀྱི་གསར་འགྱུར།
Typography

༢༠༡༨ལོའི་ཟླ་༨ཚེས་༡༦ཉིན། བོད་ནས་གནས་ཚུལ་འབྱོར་བ་ལྟར་ན། རྒྱལ་ཁབ་ཁ་བྲལ་ལ་ངན་སྐུལ་བྱས་པའི་བསྙོན་འཛུགས་འོག་ཏུ་དུས་བཙོན་ཉེས་ཆད་བཅད་པའི་བོད་ཀྱི་ཆབ་སྲིད་བཙོན་པ་ནམ་མཁའ་བྱམས་གློད་གྲོལ་བཏང་ཡང་། རྒྱ་གཞུང་གིས་སྤྱི་ཚོགས་བརྒྱུད་ལམ་ཁག་ལ་སྟངས་འཛིན་ཤུགས་ཆེར་བཏང་བའི་རྐྱེན་གྱིས་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད།

དེ་ཡང་ཟླ་༨་ཚེས་༡༠ཉིན་བོད་ཀྱི་ཆབ་སྲིད་བཙོན་པ་ནམ་མཁའ་བྱམས་ལོ་༦་བཙོན་འཇུག་དུས་ཡུན་ཚང་ནས་ཟི་ལིང་གི་བཙོན་ཁང་ཞིག་ནས་གློད་གྲོལ་བཏང་སྟེ་ཕ་ཡུལ་རེབ་གོང་ལྕང་སྐྱ་སྡེ་བར་འབྱོར་ཡོད་ནའང་། ཁོང་གི་འཕྲོད་བསྟེན་གནས་སྟངས་དང་གློད་གྲོལ་གཏོང་སའི་བཙོན་ཁང་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད་ཅིང་། ཕྱི་ལོ་༢༠༡༢ ཟླ་༢ ནང་རྒྱ་གཞུང་གིས་དགེ་རྒན་ནམ་མཁའ་བྱམས་ལ་བོད་ནང་གི་རང་སྲེག་ཞི་རྒོལ་གྱི་གནས་ཚུལ་དང་པར་རིས་བོད་ཕྱི་ནང་གི་གནས་འཕྲིན་བརྒྱུད་ལམ་ཁག་ཏུ་བརྒྱུད་གཏོང་བྱས་རབས་ཀྱི་ནག་ཉེས་བཙུགས་ཏེ་འཛིན་བཟུང་བཀག་སྐྱིལ་བྱས་པ་དང་། ཕྱི་ལོ་༢༠༡༣ ཟླ་༤ ནང་རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཐུན་རིན་རྫོང་དང་རྩེ་ཁོག་རྫོང་གཉིས་སུ་ཁྲིམས་ར་ཚོགས་ནས་རྒྱལ་ཁབ་ཁ་བྲལ་ལ་ངན་སྐུལ་བྱས་པའི་ཉེས་འཛུགས་འོག་ཏུ་དགེ་རྒན་ནམ་མཁའ་བྱམས་ལ་ལོ་༦ དུས་བཙོན་དང་ལོ་༣ ཆབ་སྲིད་ཁེ་དབང་འཕྲོག་པ་དང་། གཅོད་པ་རྒྱལ་ལ་ལོ་༦ དུས་བཙོན་དང་ལོ་༣ ཆབ་སྲིད་ཁེ་དབང་འཕྲོག་པ། ལྕགས་ཐར་ལ་ལོ་༤ དུས་བཙོན་དང་ལོ་༢ ཆབ་སྲིད་ཁེ་དབང་བཙན་འཕྲོག མགོན་པོ་ལ་ལོ་༣ དུས་བཙོན་དང་ལོ་༡ ཆབ་སྲིད་ཁེ་དབང་བཙན་འཕྲོག་བྱས་ཡོད་ཅིང་། དགེ་རྒན་ནམ་མཁའ་བྱམས་ཕུད་བོད་མི་གཞན་དག་དུས་ཐོག་གློད་གྲོལ་བཏང་ཡོད་མེད་ཀྱི་གནས་ཚུལ་ཡང་ཤེས་རྟོགས་མ་ཐུབ་པར་ལྷག་ཡོད།

བོད་མི་ཞིག་གིས་འདི་གར་གསར་ཁང་ལ་གནས་ཚུལ་འབྲེལ་བརྗོད་བྱེད་དོན། རྒྱ་གཞུང་གིས་གོང་ཞུས་བོད་མི་དེ་དག་ལ་ཉེས་འཛུགས་ཁྲིམས་ཆད་བཅད་སྐབས། གཅོད་པ་རྒྱལ་གྱིས་༼ཁྱེའུ་འཕྲིན་གླེང་མོལ༽་བརྒྱུད་ནས་བོད་རང་བཙན་དང་འབྲེལ་བའི་པར་རིས་དང་ཡི་གེ་ཕྱིར་བསྒྲགས་བྱས་ནས་རྒྱལ་ཁབ་ཁ་བྲལ་གྱི་གཏམ་བཤད་བྱས་རབས་དང་། ལྕགས་ཐར་གྱིས་མི་གཞན་གྱིས་རང་སྲེག་བྱེད་བཞིན་པ་ཤེས་བཞིན་དུ་སྔ་ཕྱིར་ཐེངས་གསུམ་ལ་མི་གཞན་པར་རང་སྲེག་མཁན་གྱི་འདྲ་པར་དང་ཁ་བྲལ་གྱི་ནང་དོན་ལྡན་པའི་པར་རིས་བཀྲམ་རབས། ནམ་མཁའ་བྱམས་ཀྱིས་རང་སྲེག་བྱེད་མཁན་པར་བརྒྱབ་སྟེ་གནས་འཕྲིན་དྲ་རྒྱ་སྤྱད་ནས་བོད་ཕྱི་ནང་གི་བོད་མིར་བརྒྱུད་གཏོང་བྱས་རབས། དེ་བཞིན་མགོན་པོ་ཡིས་རྒྱལ་ཁབ་ཁ་བྲལ་གྱི་ནང་དོན་ལྡན་པའི་རང་སྲེག་འདྲ་པར་བརྒྱུད་སྒྲོག་བྱས་རབས་ཀྱི་ནག་ཉེས་བཙན་འགེལ་བྱས་འདུག

ད་ལྟ་རང་ལོ་༥༦ ཡས་མས་ཤིག་ཡིན་པའི་དགེ་རྒན་ནམ་མཁའ་བྱམས་ནི་རེབ་གོང་ལྕང་སྐྱ་སྡེ་བ་ནས་ཡིན་ཞིང་། ཕྱི་ལོ་༡༩༨༠ ནང་མི་རིགས་དགེ་ཐོན་སློབ་གྲྭ་ནས་སློབ་མཐར་ཕྱིན་རྗེས། འདས་པའི་མི་ལོ་༣༠ ལྷག་རིང་རེབ་གོང་ས་ཁུལ་དུ་དགེ་རྒན་གྱི་ཕྱག་ལས་གནང་འདུག