བོད་ཀྱི་རྒྱལ་ཁབ་ཆེན་མོའི་རྒྱལ་རབས་རིམ་བྱོན་མདོར་བསྡུས།

རྒྱུ་ཡི་བོན་ཤེས་པ་ཅན་བཅུ་གཉིས་དར། ༢༽བོད་རྒྱལ་གཉིས་པ་མུ་ཁྲི་བཙན་པོ་ནི། གཉའ་ཁྲི་དང་ལྷ་སྨན་དཀར་མོའི་སྲས་སུ་འཁྲུངས། འཕྱོ་མ་ཡེ་སངས་ཁབ་ཏུ་བཞེས། སྐུ་གཤེན་གཅོའུ་ཕྱག་དཀར་གྱིས་མཛད། ལྷ་རི་གྱང་མ་གྱང་ཏོའི་རྩེ་ལ་གསས་མཁར་ཁོལ་མ་ནེ་ཆུང་བཞེངས། དཔོན་གསས་ནམ་མཁའ་སྣང་བ་མདོག་ཅན་ལ་དབང་ཞུས་ནས་སྤྱི་སྤུངས་གསང་བའི་བོན་ལ་ཐུགས་དམ་མཛད། ཞང་ཞུང་ནས་མཁས་པ་བརྒྱ་རྩ་བརྒྱད་གདན་དྲངས་ནས། བོད་དུ་བོན་གྱི་འདུ་གནས་སོ་བདུན་བཙུགས། ལྟ་བ་བླ་ན་མེད་པའི་བོན་དང༌། ཐེག་པ་བླ་ན་མེད་པའི་བོན། སྤྱོད་པ་བླ་ན་མེད་པའི་བོན། འབྲས་བུ་བླ་ན་མེད་པའི་བོན། དོན་དམ་བླ་ན་མེད་པའི་བོན་རྣམས་དར། གཤེན་པོ་དྲུག་ཅུ་རྩ་དགུ་དང༌། བོན་གཤེན་བཞི་བཅུ་རྩ་གཉིས་བྱུང༌། ༣༽བོད་རྒྱལ་གསུམ་པ་ཏིང་ཁྲི་བཙན་པོ་ནི། མུ་ཁྲི་དང་འཕྱོ་མ་ཡེ་སངས་སྲས་སུ་འཁྲུངས། ཁྲི་མ་སྟོང་འཕྱོ་ཁབ་ཏུ་བཞེས། སྐུ་གཤེན་གཅོའུ་སྨིན་དཀར་གྱིས་མཛད། འཇག་མོ་རྩེ་ལ་གསས་མཁར་ཁོལ་མ་ཡང་རྩེ་བཞེངས། ༤༽བོད་རྒྱལ་བཞི་པ་སོ་ཁྲི་བཙན་པོ་ནི། ཏིང་ཁྲི་དང་ཁྲི་མ་སྟོང་འཕྱོའི་སྲས་སུ་འཁྲུངས། གནམ་སྨན་ཕྱུག་མོ་ཁབ་ཏུ་བཞེས། སྐུ་གཤེན་གཅོའུ་འོད་དཀར་གྱིས་མཛད། གྲམ་པ་ཚལ་དུ་གསས་མཁར་དགུ་ར་དགུ་ཁྱུད་བཞེངས། ༥༽བོད་རྒྱལ་ལྔ་པ་དར་ཁྲི་བཙན་པོ་ནི། སོ་ཁྲི་གནམ་སྨན་གྱི་སྲས་སུ་འཁྲུངས། སིང་སྨན་ཕྱུག་མོ་ཁབ་ཏུ་བཞེས། སྐུ་གཤེན་གཅོའུ་ཤང་དཀར་མཛད། གཙང་ཡར་ལུང་དུ་གསས་ཁང་ཟོ་བོ་ཁྱུང་ལག་བཞེངས།

༦༽བོད་རྒྱལ་དྲུག་པ་བྱང་ཁྲི་བཙད་པོ་ནི། དར་ཁྲི་དང་སིང་སྨན་གྱི་སྲས་སུ་འཁྲུངས། ཡེ་ཕྱི་གོང་སངས་ཁབ་ཏུ་བཞེས། སྐུ་གཤེན་གཅོ་མི་ཆེས་ཀྱིས་བསྲུངས། ཡེར་པའི་བྲག་ལ་གསས་ཁང་གཡུང་དྲུང་ཁྲི་བརྩེགས་བཞེངས། ༧༽བོད་རྒྱལ་བདུན་པ་ཁྲི་ལྡེ་ཡག་པ་ནི། བྱང་ཁྲི་དང་སིང་སྨན་གྱི་སྲས་སུ་འཁྲུངས། སྦྲང་བཟའ་ལྷ་རྒྱན་ཁབ་ཏུ་བཞེས། སྐུ་གཤེན་གཅོའུ་ཞལ་དཀར་གྱིས་བསྲུངས། ཉང་རོ་ཟླ་བའི་ཚལ་དུ་གསས་ཁང་ཁོང་མ་རུ་རིང་བཞེངས། དེ་ཡན་ཆད་གནམ་གྱི་ཁྲི་བདུན་བྱ་བ་སྟེ། གནམ་གྱི་ལྷ་སྨན་དང་བཤོས་པའི་སྲས་ལགས་སོ། །

གཉིས་པ་བར་གྱི་ལྡིང་གཉིས་ནི། ༨༽བོད་རྒྱལ་བརྒྱད་པ་གྲི་གུམ་བཙད་པོ་ནི། ཁྲི་ལྡེ་ཡག་པ་དང་སྦྲང་བཟའི་སྲས་སུ་འཁྲུངས། དཔལ་བཟའ་ཁྲི་བཙུན་ཁབ་ཏུ་བཞེས། སྐུ་གཤེན་གཅོའུ་ཚེམས་དཀར་ཡིན། ས་ཚན་སྒོ་ཕུགས་སུ་གསས་ཁང་ས་ལེ་བྱེལ་ཚང་བཞེངས། ༩༽བོད་རྒྱལ་དགུ་པ་སྤུ་ལྡེ་གོང་རྒྱལ་ནི། གྲི་གུམ་དང་དཔལ་བཟའི་སྲས་སུ་འཁྲུངས། བུམ་ཐང་སྨད་མཚོ་ཁབ་ཏུ་བཞེས། སྐུ་གཤེན་གཅོ་གཉན་བཞེར་གྱིས་བསྲུངས། གསས་མཁར་ཟོ་བོ་ཁྱུང་ལག་བཞེངས། གྲི་གུམ་དང་སྤུ་ལྡེ་གཉིས་ནི་བང་སོ་ས་ལ་བཏབ་ཅིང་མངའ་ཐང་བྲི་བས་བར་གྱི་ལྡིང་གཉིས་ཟེར།

གསུམ་པ་ས་ལ་ལེགས་དྲུག་ནི། ༡༠༽བོད་རྒྱལ་བཅུ་པ་ཨ་ཤོ་ལེགས་རྒྱལ་ནི། སྤུ་ལྡེ་དང་བུམ་ཐང་སྨན་མཚོའི་སྲས་སུ་འཁྲུངས། དམུ་ལྕམ་དྲ་མ་ཁབ་ཏུ་བཞེས། སྐུ་གཤེན་སྟོ་ར་ཤིབ་གཤང་གིས་སྲུང༌། གསས་ཁང་ས་ལེ་ལྗོན་ཕྱུག་བཞེངས། ༡༡༽བོད་རྒྱལ་བཅུ་གཅིག་པ་དེ་ཤོ་ལེགས་རྒྱལ་ནི། ཨ་ཤོ་དང་དམུ་ལྕམ་སྲས་སུ་འཁྲུངས། བཙུན་མོ་གུར་སྨན་ཁབ་ཏུ་བཞེས། སྐུ་གཤེན་མི་མོ་ཆུང་གིས་མཛད། གསས་ཁང་ཁོ་མ་ཡང་རྩེ་བཞེངས། ༡༢༽བོད་རྒྱལ་བཅུ་གཉིས་པ་ཐི་ཤོ་ལེགས་ནི། དེ་ཤོ་དང་དམུ་ལྕམ་སྲས་སུ་འཁྲུངས། མཚོ་སྨན་འབྲང་མ་ཁབ་ཏུ་བཞེས། སྐུ་གཤེན་འཛིན་བོན་ཁོག་དེར་མཛད། གསས་ཁང་སལེ་བང་བང་བཞེངས། ༡༣༽བོད་རྒྱལ་བཅུ་གསུམ་པ་གུ་རུམ་ལེགས་རྒྱལ་ནི། ཐི་ཤོ་དང་མཚོ་སྨན་སྲས་སུ་འཁྲུངས། སྨན་བུ་མོ་ཁབ་ཏུ་བཞེས། སྐུ་གཤེན་མཚེས་པ་གནམ་འདུལ་གྱིས་བསྲུངས། གསས་ཁང་རིན་ཆེན་ཟུར་མང་བཞེངས། ༡༤༽བོད་རྒྱལ་བཅུ་བཞི་པ་འབྲང་ཞི་ལེགས་རྒྱལ་ནི། གུ་རུམ་དང་སྨན་བུ་མོའྀ་སྲས་སུ་འཁྲུངས། ཀླུ་ལྕམ་མི་མོ་ཁབ་ཏུ་བཞེས། སྐུ་སྲུང་ལྷ་བོན་ཡེ་ཤེས་བདུད་འདུལ་མཛད། ༡༥༽བོད་རྒྱལ་བཅོ་ལྔ་པ་ཨི་ཤོ་ལེགས་ཀྱིས། དམུ་ལྕམ་སྨད་ལེགས་ཁབ་ཏུ་བཞེས། དེ་རྣམས་ཀྱི་རིང་ལ་འདས་དུས་ནས་སྤུར་ལ་ལུས་པས་ས་ལ་ལེགས་དྲུག་ཟེར། བོན་རིག་པའི་གནས་ལྔ་རྣམས་དར་རོ།།

བཞི་པ་ཆུ་ལ་ལྡེ་བརྒྱད་ནི། ༡༦༽བོད་རྒྱལ་བཅུ་དྲུག་པ་ཟ་ནམ་ཟིན་ལྡེ་ནི། ཨི་ཤོ་དང་དམུ་ལྕམ་སྨད་ལེགས་ཀྱི་སྲས་སུ་འཁྲུངས། ཞང་ཞུང་གཡུང་དྲུང་རྒྱལ་པོས་སྐུ་བསྲུངས། ༡༧༽བོད་རྒྱལ་བཅུ་བདུན་པ་ལྡེ་འཕྲུལ་ནམ་ཞུང་བཙན་ནི། ཟ་ནམ་དང་དམུ་ལྕམ་གྱི་སྲས་སུ་འཁྲུངས། མཚོ་སྨན་ཁྲི་དཀར་ཁབ་ཏུ་བཞེས། ཞང་ཞུང་མཚེ་མི་ཀུན་སྣང་གིས་སྐུ་བསྲུངས། ༡༨༽བོད་རྒྱལ་བཅོ་བརྒྱད་པ་སེ་སྣོལ་གནམ་ལྡེ་ནི། ལྡེ་འཕྲུལ་དང་སེ་གཉན་མང་མོའི་སྲས་སུ་འཁྲུངས། ཀླུ་ཐང་མེར་མོ་ཁབ་ཏུ་བཞེས། ཞང་ཞུང་དོན་རྟོགས་རྒྱལ་པོས་སྐུ་བསྲུངས། ༡༩༽བོད་རྒྱལ་བཅུ་དགུ་པ་སེ་སྣོལ་པོ་ལྡེ་ནི། སེ་གནམ་དང་ཀླུ་ཐང་མེར་མོའི་སྲས་སུ་འཁྲུངས། འོད་བཟའ་ཏི་མོ་མཚོ་ཁབ་ཏུ་བཞེས། ཞང་ཞུང་ཨ་པོ་གཙུག་ཕུད་ཀྱིས་སྐུ་བསྲུངས། ༢༠༽བོད་རྒྱལ་ཉི་ཤུ་པ་ལྡེ་སྣོལ་ནམ་ནི། སེ་སྣོལ་དང་འོད་བཟའི་སྲས་སུ་འཁྲུངས། ཁྲི་སྨན་རྗེ་མ་ཁབ་ཏུ་བཞེས། ཞང་ཞུང་ཨ་ལ་དན་ཅིས་སྐུ་བསྲུངས། ༢༡༽བོད་རྒྱལ་ཉེར་གཅིག་པ་ལྡེ་སྣོལ་པོ་ནི། ལྡེ་ནམ་དང་ཁྲི་སྨན་གྱི་སྲས་སུ་འཁྲུངས། ས་བཙུན་གཉན་རྗེ་ཁབ་ཏུ་བཞེས། ཞང་ཞུང་ད་ར་མ་ཧ་ཏིས་སྐུ་བསྲུངས། ༢༢༽བོད་རྒྱལ་ཉེར་གཉིས་པ་ལྡེ་རྒྱལ་པོ་ནི། ལྡེ་སྣོལ་དང་གཉན་རྗེའི་སྲས་སུ་འཁྲུངས། སྨན་བཙུན་ལུང་གོང་ཁབ་ཏུ་བཞེས། ཞང་ཞུང་ད་པ་ཧ་ཏིས་སྐུ་བསྲུངས། ༢༣༽བོད་རྒྱལ་ཉེར་གསུམ་པ་ལྡེ་སྤྲིན་བཙན་ནི། ལྡེ་རྒྱལ་དང་སྨན་བཙུན་གྱི་སྲས་སུ་འཁྲུངས། གཉན་བཙུན་མང་མོ་རྗེ་ཁབ་ཏུ་བཞེས། ཞང་ཞུང་མུ་ལ་མ་ཧོས་ཀྱིས་སྐུ་བསྲུངས། བོད་རྒྱལ་དེ་བརྒྱད་ཀྱི་བང་སོ་ཆུ་བོའི་གཞུང་ལ་བཏབ་པས་ཆུ་ལ་ལྡེ་བརྒྱད་ཟེར། བོན་འབུམ་སྡེའི་གཞུང་དར།ལྷུན་གྲུབ་དབྱིངས་ཀྱི་གསས་ཁང་སོགས་བཞེངས།

ལྔ་པ་བར་གྱི་བཙན་ལྔ་ནི། ༢༤༽བོད་རྒྱལ་ཉེར་བཞི་པ་ཏོ་རོ་ལོ་བཙན་ནི། ལྡེ་སྤྲིན་དང་གཉན་བཙུན་གྱི་སྲས་སུ་འཁྲུངས། འོ་མ་ལྡེ་བཟའ་ཁྲི་བཙུན་མ་ཁབ་ཏུ་བཞེས། ཞང་ཞུང་ཏ་ར་ལ་ཧ་ཏིས་སྐུ་བསྲུངས། ༢༥༽བོད་རྒྱལ་ཉེར་ལྔ་པ་ཁྲི་ནམ་བཙན་ནི། རྒྱལ་ཏོ་རོ་ལོ་དང་ལྡེ་བཟའི་སྲས་སུ་འཁྲུངས། སྨན་བཟའ་ཁྲི་དཀར་ཁབ་ཏུ་བཞེས། ཞང་ཞུང་མུ་ལ་ཧ་རྒྱལ་གྱིས་སྐུ་བསྲུངས། ༢༦༽བོད་རྒྱལ་ཉེར་དྲུག་པ་ཁྲི་སྒྲ་དཔུང་བཙན་ནི། ཁྲི་ནམ་དང་སྨན་བཟའ་ཁྲི་དཀར་སྲས་སུ་འཁྲུངས། སྨན་བཟའ་ཀླུ་སྟེང་ཁབ་ཏུ་བཞེས། ༢༧༽བོད་རྒྱལ་ཉེར་བདུན་པ་ཁྲི་ཐོག་རྗེ་བཙན་ནི། ཁྲི་སྒྲ་དང་སྨན་བཟའ་ཀླུ་སྟེང་སྲས་སུ་འཁྲུངས། ཞང་ཞུང་མུ་ལ་ཧ་རྒྱལ་གྱིས་སྐུ་བསྲུངས། གོང་གི་རྒྱལ་པོ་དེ་གསུམ་གྱི་རིང་ལ་སྐུ་སྲུང་ཞང་ཞུང་མུ་ལ་ཧ་རྒྱལ་གྱིས་མཛད། ༢༨༽བོད་རྒྱལ་ཉེར་བརྒྱད་པ་ལྷ་ཐོ་ཐོ་རི་སྙན་བཙན་ནི། ཁྲྀ་ཐོག་དང་རུ་ཡོང་བཟའ་སྟོང་རྒྱལ་ནམ་མཚོའི་སྲས་སུ་འཁྲུངས། གུར་སྨན་དང༌། སྣོ་བཟའ་མ་སོ་རྗེ་ཁབ་ཏུ་བཞེས། གཅོ་ཡི་བོན་པོ་གཡང་སྐྱེས་དང༌། མཚེའི་བོན་པོ་འདུལ་སྲོང༌། འབྲིའི་བོན་པོ་ཤོ་ཏྲི་གསུམ་གྱིས་སྐུ་བསྲུངས། བཙན་པོ་དེ་ལྔའི་རིང་ལ་རྒྱལ་ཁྲིམ་ས་བཙན་པོ་ཡོད་པས་བར་གྱི་བཙན་ལྔ་ཟེར། གཉན་པོ་གསང་བ་ཞེས་པའི་ཆོས་བྱུང༌།

དྲུག་པ་ཕུན་སུམ་འཚོགས་པའི་བོན་རྒྱལ་བཞི་ནི། ༢༩༽བོད་རྒྱལ་ཉེར་དགུ་པ་ཁྲི་གཉན་གཟུང་བཙན་ནི། ཐོ་རི་དང་སྣོ་བཟའི་སྲས་སུ་འཁྲུངས། འབྲོང་བཟའ་དར་མ་གཡང་གཞེར་ཁབ་ཏུ་བཞེས། ཁུའི་བོན་པོ་མང་སྒྲ་ལེགས་པས་སྐུ་བསྲུངས། བློན་པོ་བླག་ཐོག་རྗེ་ཡིན། ༣༠༽བོད་རྒྱལ་སུམ་ཅུ་པ་འབྲོང་སྙན་ལྡེའུ་ནི། ཁྲི་གཉན་དང་འབྲོང་བཟའི་སྲས་སུ་འཁྲུངས། མཆིམ་བཟའ་ཀླུ་རྒྱལ་ངན་ནེ་མཚོ་ཁབ་ཏུ་བཞེས། ཁུའི་བོན་པོ་མང་རྗེ་ལོད་པོས་སྐུ་བསྲུངས། བློན་པོ་ཐུར་ཐོགས་འབྲིང་ཡས་སོ། ། ༣༡༽བོད་རྒྱལ་སོ་གཅིག་པ་སྟག་གོང་སྙན་གཟིགས་ནི། འབྲོང་སྙན་དང་མཆིམ་བཟའི་སྲས་སུ་འཁྲུངས། འོལ་གོད་བཟའ་སྟོང་བཙུན་ཁབ་ཏུ་བཞེས། སྐུ་གཤེན་ར་སངས་ཁྲིན་ནེ་ཁོད་མཛད། བློན་པོ་སྔགས་ཁྲི་བཟང་ངོ། ། ༣༢༽བོད་རྒྱལ་སོ་གཉིས་པ་གནམ་རུ་སྲོང་བཙན་ནི། སྟག་གོང་དང་འོལ་གོད་བཟའི་སྲས་སུ་འཁྲུངས། ཚེ་སྤོང་བཟའ་འབྲི་མ་ཐོད་དཀར་ཁབ་ཏུ་བཞེས། སྐུ་གཤེན་ཟ་ལྷ་དབང་ཕྱུག་གིས་མཛད། བློན་པོ་ཐོ་མི་འབྲི་ཏོ་ཡིན། རྒྱལ་པོ་དེ་བཞིའི་རིང་བོན་ལ་བཀུ་བསྟི་ཤིན་ཏུ་ཆེ་ཞིང་ཆབ་སྲིད་རྒྱས་པས་ཕུན་སུམ་ཚོགས་པའི་བོན་རྒྱལ་བཞི་ཟེར། རྒྱས་པ་འབུམ། འདུལ་བ་རྒྱུད་དྲུག མངོན་པ་སྡེ་བཞི། མཚན་ཉིད་སྡེ་ལྔ་བཅས་ངོ་མཚར་བཀའ་ཡི་བོན་བཞི་དར།

བདུན་པ་ཆོས་ཀྱི་སྲོལ་འབྱེད་རྒྱལ་པོ་ལྔ་ནི། ༣༣༽བོད་རྒྱལ་སོ་གསུམ་པ་སྲོང་བཙན་ལྡེ་བཙན་ནི། གནམ་རུ་དང་འོལ་གོད་བཟའི་སྲས་སུ་འཁྲུངས། ཞང་ཞུང་བཟའ་ལི་ཏིང་སྨན། རྒྱ་བཟའ་ཀོང་ཇོ། བལ་བཟའ་ཁྲི་བཙུན་སོགས་ཁབ་ཏུ་བཞེས། བློན་པོ་ཁྲི་ཏོ་རེ་གནང་བཙན་ཡིན། ཐེམ་ཆེན་ལྷ་ཁང་དང༌། ར་ས་འཕྲུལ་སྣང་ལྷ་ཁང༌། ར་མོ་ཆེའི་ལྷ་ཁང་བཞེངས། ༣༤༽བོད་རྒྱལ་སོ་བཞི་པ་གོང་སྲོང་གོང་བཙན་ནི། སྲོང་བཙན་དང་འབྲོ་ཁྲི་མ་འགྲིང་ཏིང་གི་སྲས་སུ་འཁྲུངས། འ་ཞ་བཟའ་ཁོན་ཇོ་མོན་མོ་རྗེ་ཁྲི་དཀར་ཏིང་ཤག་ཁབ་ཏུ་བཞེས། སྐུ་གཤེན་ཞང་ཞུང་ཁྱུང་སྐར་མཛད། བློན་པོ་བསྒྲུབ་ཏོ་རེ་སྣང་ཚབ་ཡིན། ༣༥༽བོད་རྒྱལ་སོ་ལྔ་པ་མང་སྲོང་མང་བཙན་ནི། གུང་སྲོང་དང་འ་ཞ་བཟའི་སྲས་སུ་འཁྲུངས། འབྲོང་བཟའ་ཁྲི་སེ་ཁྲི་མ་ལོད་ཁབ་ཏུ་བཞེས། སྐུ་གཤེན་ཁྱུང་པོ་སྟག་སྒྲས་མཛད། བློན་པོ་འགར་ཁྲོ་སྒྲ་ཡིན། ༣༦༽བོད་རྒྱལ་སོ་དྲུག་པ་རླུང་སྲོང་རླུང་བཙན་ནི། མང་སྲོང་དང་འབྲོང་བཟའི་སྲས་སུ་འཁྲུངས། མཆིམ་བཟའ་བཙན་མོ་ཏོག་ཁབ་ཏུ་བཞེས། སྐུ་གཤེན་སྤེ་ནེ་གུས་མཛད། བློན་པོ་སྤུ་དང་ཟུ་ཟེ་ཡིན། ༣༧༽བོད་རྒྱལ་སོ་བདུན་པ་ཁྲི་ལྡེ་གཙུག་བཙན་ནི། རླུང་སྲོང་དང་མཆིམ་བཟའི་སྲས་སུ་འཁྲུངས། རྒྱ་མོ་བཟའ་ཨུན་ཆུང་དང༌། སྣ་ནམ་བཟའ་ཡང་མོ་ཁབ་ཏུ་བཞེས། དེ་དག་གི་རིང་ལ་ཆོས་ཀྱི་སྲོལ་ཚུགས་པས་ཆོས་ཀྱི་སྲོལ་འབྱེད་རྒྱལ་པོ་ཟེར།

བརྒྱད་པ་རྒྱལ་སྲིད་ཐ་མའི་རྒྱུད་འཛིན་དྲུག་ནི། ༣༨༽བོད་རྒྱལ་སོ་བརྒྱད་པ་ཁྲི་སྲོང་ལྡེ་བཙན་ནི། ཁྲི་ལྡེ་གཙུག་བཙན་དང་སྣ་ནམ་བཟའ་མང་མོ་རྗེ་གཉིས་ཀྱི་སྲས་སུ་འཁྲུངས། ཚེ་སྤུངས་བཟའ་སྟོང་སྐར་མ་ཁབ་ཏུ་བཞེས། སྐུ་གཤེན་སྤེ་ནེ་གུང་མཛད། བློན་པོ་འགར་སྟོང་བཙན་ཡུལ་བཟང༌། འོ་མ་སེ་སྣ་ནམ། ཞང་མ་ཞང་ཁྲོམ་པ་སྐྱེས། སྦས་ཁྲི་བཟང་སྟོང་ཡོད། ངམ་སྟག་ར་ཀླུ་གོང༌། འགོས་ཁྲི་བཟང་ཡབ་ལྷག་བཅས་ཡིན། ༣༩༽བོད་རྒྱལ་སོ་དགུ་པ་མུ་ནེ་བཙན་པོ་ནི། ཁྲི་སྲོང་དང་ཚེ་སྤུངས་བཟའི་སྲས་གསུམ་གྱི་ཆེ་བ་དེ་ཡིན། ཇོ་མོ་ཕོ་ཡོང་བཟའ་རྒྱལ་མོ་བཙུན་ཁབ་ཏུ་བཞེས། ༤༠༽བོད་རྒྱལ་བཞི་བཅུ་པ་ཁྲི་ལྡེ་སྲོང་བཙན་ནི། ཁྲི་སྲོང་དང་ཚེ་སྤུངས་བཟའི་སྲས་གསུམ་ལས་ཆུང་བ་དེ་ཡིན། འབྲོ་བཟའ་ལྷ་རྒྱལ་མང་མོ་རྗེ་ཁབ་ཏུ་བཞེས། ༤༡༽བོད་རྒྱལ་ཞེ་གཅིག་པ་ཁྲི་གཙུག་ལྡེ་བཙན་རལ་པ་ཅན་ནི། ཁྲི་ལྡེ་སྲོང་བཙན་དང༌། འབྲོང་བཟའ་ལྷ་རྒྱལ་མང་མོ་རྗེའི་སྲས་ལྔ་ལས་ཆེ་བ་དེ་ཡིན། ༤༢༽བོད་རྒྱལ་ཞེ་གཉིས་པ་འུ་དུམ་བཙན་པོ་ནི། ཁྲི་ལྡེ་སྲོང་བཙན་དང༌། འབྲོང་བཟའ་ལྷ་རྒྱལ་མང་མོ་རྗེའི་སྲས་ལྔ་ལས་གསུམ་པ་དེ་ཡིན། བཙུན་མོ་ཆེ་བ་སྣ་ནམ་བཟའ་དང༌། ཆུང་བ་ཚེ་སྤོང་བཟའ་གཉིས་ཁབ་ཏུ་བཞེས། གདུང་རབས་དེ་དྲུག་ལ་ཆོས་ལ་གུས་པ་ཆེ་ཡང་མངའ་ཐང་སྔོན་ལས་བྲི་བས་ན་རྒྱལ་སྲིད་ཐ་མ་དྲུག་ཟེར་རོ།། དེའི་ཡན་ཆད་རྒྱལ་རབས་ཞེ་གཉིས་ནི་བོད་སྤྱི་ལ་དབང་བའི་རྒྱལ་པོ་ཡིན།

གླང་དར་མའི་སྲས་ཡུམ་བརྟན་བྱུང༌། ཁྲི་དར་མའི་སྲས་ཁྲི་དར་མ་འོད་སྲུང་བཙན་གྱི་གདུང་རབས་དག་གིས་གུ་གེ་ཡར་ཀླུང་མངའ་རིས་བཅས་ལ་དབང་བསྒྱུར་བའི་རྒྱལ་པོ་བྱས་སོ།།