རྒྱ་བོད་ས་མཚམས་གོམ་བགྲོད་པ་རྣམས་དྷ་སར་འབྱོར་སོང་།

ཕྱི་ལོ་༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་ལྷ་ས་ནོར་གླིང་རྟག་བརྟན་མི་འགྱུར་ཕོ་བྲང་ནས་རྒྱ་གར་ནང་ཆིབས་བསྒྱུར་མཛད་དེ་མི་ལོ་ ༦༠ འཁོར་གྱི་ཡོད་པ་དང་། འདི་ལོ་ནི་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོ་ཞིག་ཏུ་སྲུང་གཙི་གནང་གཏན་འཁེལ་བ་ལྟར། ཨ་རུ་ནཱ་ཅལ་གྱི་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་གོ་སྒྲིག་འོག སེར་སྐྱ་མི་གྲངས་ ༤༠ ཙམ་གྱིས་འཕགས་བོད་ས་མཚམས་ཆུ་དྭངས་མོ་ནས་རྗེས་དྲན་གོམ་བགྲོད་དབུ་འཛུགས་གནང་སྟེ། དེ་སྔོན་༧གོང་ས་མཆོག་ཆིབས་བསྒྱུར་མཛད་ཡུལ་རླུང་ལ་དང་རྟ་དབང་། བྱང་སྡེ་རང་། འབུམ་སྡེ་ལ། དེ་བཞིན་སེང་གེ་རྫོང་སོགས་སུ་གོམ་བགྲོད་གནང་ཡོད་པ་མ་ཟད། ས་གནས་སོ་སོར་མང་ཚོགས་རྣམས་ལ་༸གོང་ས་རྒྱལ་བ་རིན་པོ་ཆེ་མཆོག་གི་མཛད་རྣམ་ངོ་སྤྲོད་དང་སྐུ་པར་འགྲེམས་སྤེལ། དེ་བཞིན་དགོན་སྡེ་ཁག་ལ་ཆོས་ཕྱོགས་ཀྱི་ལས་དོན་སོགས་སྤེལ་ཏེ། ཟླ་འདིའི་ཕྱི་ཚེས་ ༢༧ ཉིན་ཨ་སམ་མངའ་སྡེའི་གྲོང་ཁྱེར་ཏེ་ཛི་པུར་དྷེ་རེན(Darrang)མཐོ་རིམ་སློབ་གཉེར་ཁང་དུ་གོམ་བགྲོད་ལེགས་པར་མཇུག་བསྡུས་ཡོད་པ་དང་། ཁ་སང་གོམ་བགྲོད་ལས་འགུལ་བ་རྣམས་རྒྱ་གར་གྱི་རྒྱལ་ས་ལྡི་ལིར་འབྱོར་ཏེ་ལྡི་ལིའི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱི་དབུས་ས་གནས་སེར་སྐྱ་མི་མང་གིས་ཕེབས་བསུ་སྣེ་ལེན་ཞུས་ཡོད་པ་རེད།

རྒྱ་གར་དབུས་གྲོས་ཚོགས་ཀྱི་འཐུས་མི་ཟུར་པ་དང་མངའ་སྡེའི་བློན་ཆེན་ཟུར་པ། ད་ལྟའི་ཆར་བྷེ་ཇེ་པི་ཆབ་སྲིད་ཚོགས་པའི་ནང་ཕྱག་ལས་གནང་བཞིན་པའི་སྐུ་ཞབས་རིན་ཆེན་མཁའ་འགྲོ་ཁིར་མི་(Shri R. K. Khrimey)དང་། རྟ་དབང་དགོན་པའི་མཁན་ཟུར་གུ་རུ་སྤྲུལ་སྐུ་གཉིས་ཀྱི་གསར་འགོད་པར་བརྗོད་དོན་དུ། རྟ་དབང་གི་ས་ཁུལ་དེ་རྒྱལ་སྤྱིའི་ས་ཆའི་གནས་བབ་རང་བཞིན་གྱི་ཆ་ནས་དམ་དྲག་ཧ་ཅང་ཆེན་པོ་ཡོད་ས་དང་། ནམ་རྒྱུན་ནས་ལས་འགུལ་འདྲ་མིན་སྤེལ་བར་དཀའ་ངལ་འཕྲད་སའི་ས་ཁུལ་ཞིག་ཆགས་ཀྱི་ཡོད་ཀྱང་། ད་ལན་རྒྱ་གར་བོད་ཀྱི་བདེན་དོན་ཚོགས་པའི་གོ་སྒྲིག་འོག་ས་གནས་རྟ་དབང་དང་། བྷེན་ཌེ་ལ། ནུབ་ཀ་མེང་རྫོང་བཅས་ཀྱི་ཁོངས་སུ་ཡོད་པའི་གཞུང་འབྲེལ་མ་ཡིན་པའི་ཚོགས་པ་འཕགས་བོད་མཛའ་འབྲེལ་ཚོགས་པ་དང་། སློབ་ཕྲུག་ཤེས་ཡོན་རྒྱབ་སྐྱོར་ཚོགས་པ། བསྟན་དོན་ཚོགས་པ། བཏང་སྙོམས་ཚོགས་པ། ཉམས་ཐག་ཤེས་ཡོན་རོགས་སྐྱོར་ཚོགས་པ་ལ་སོགས་པ་གཞུང་འབྲེལ་མ་ཡིན་པའི་ཚོགས་པ་ཁག་མང་པོ་ཞིག་ལ་བརྟེན་ནས། ཞི་བའི་གོམ་བགྲོད་ལས་འགུལ་འདི་ཧ་ཅང་དོན་དང་ལྡན་པ་དང་ཡག་པོ་བྱུང་ཡོད་པ་རེད།

མ་ཟད་རྒྱལ་སྤྱིའི་ཐོག་ནས་ཞི་བའི་གོམ་བགྲོད་ལས་འགུལ་འདིར་དོ་སྣང་ཤུགས་ཆེན་པོ་བྱུང་ཡོད་སྐོར། རྒྱ་གར་དབུས་གཞུང་ནས་ས་གནས་གཞུང་གི་ལས་བྱེད་པ་དང་། ཆབ་སྲིད་ཀྱི་འགོ་ཁྲིད་ཚོ་ལས་འགུལ་འདིའི་ནང་མཉམ་ཞུགས་གནང་རྒྱུ་མེད་པའི་ལམ་སྟོན་གནང་ཡོད་སྟབས། ལས་འགུལ་འདི་གཞུང་འབྲེལ་མ་ཡིན་པའི་ཚོགས་པ་ཚོ་དང་། རིས་སུ་མ་ཆད་པའི་གྲྭ་བཙུན་གྱི་དགོན་སྡེ་ཁག མི་མང་རང་བཅས་ཀྱི་རྒྱབ་སྐྱོར་ཚད་མཐོན་པོའི་ཐོག་ནས་༧གོང་ས་སྐྱབས་མགོན་ཆེན་པོ་སྐུ་དངོས་སུ་ཕེབས་པ་བཞིན་ས་གནས་སོ་སོར་གྲ་སྒྲིག་བྱས་ནས་ལས་འགུལ་ཚགས་ཚུད་པོ་བྱུང་ཡོད་སྐོར། ས་གནས་སོ་སོར་མི་མང་འདུ་འཛོམས་སྐབས་ས་གནས་དེ་རང་གི་སྐད་ཐོག་ནས་༧གོང་ས་མཆོག་གི་མཛད་རྣམ་དང་། ཐུགས་འགན་གསུམ་ངོ་སྤྲོད་དང་། དེའི་ཐོག་བགྲོ་གླེང་དང་དྲི་བ་དྲིས་ལན་བརྒྱུད་གཞོན་སྐྱེས་མི་རབས་གསར་པ་རྣམས་ལ་གོ་རྟོགས་གསར་པ་སྤེལ་ཐུབ་ཡོད་སྐོར། ཕྱི་ལོ་༡༩༥༩ ལོར་༧གོང་ས་མཆོག་བོད་ནས་རྒྱ་གར་ལ་སྐྱབས་བཅོལ་ཕེབས་དུས་ཕེབས་ལམ་གང་གི་ཐོག་ནས་ཕེབས་ཡོད་མེད་གསལ་པོ་མ་ཤེས་པ་རྣམས་ལ་ད་ལན་གསལ་པོ་ཆགས་ནས་དེའི་ཐོག་དྲི་བ་དྲིས་ལན་བྱུང་ཁར། དེའི་ཐོག་སློབ་སྦྱོང་བྱེད་ཀྱི་ཡིན་ཟེར་མཁན་མང་པོ་བྱུང་ཡོད་སྐོར། ༧གོང་ས་མཆོག་བཙན་བྱོལ་དུ་ཕེབས་པ་དེ་རྒྱ་མིས་བོད་རྒྱལ་ཁབ་ཆེན་པོ་བཙན་བཟུང་བྱས་པའི་ཆབ་སྲིད་ཀྱི་གནས་སྟངས་ཐོག་ནས་ཕེབས་དགོས་ཁེལ་ཡོད་པ་ས་གནས་སུ་ངོ་སྤྲོད་བྱས་ཡོད་པ་རེད།

ཏེ་ཛུར་དང་གྷོ་ཝ་ཧ་ཊིར་ཞི་བའི་གོམ་བགྲོད་དང་འབྲེལ་བའི་གསར་འགོད་གསལ་བསྒྲགས་སྤེལ་སྐབས་བོད་ཀྱི་བདེན་མཐའ་སེལ་རྒྱུ་ནི་རྒྱ་གར་གྱི་ཆབ་སྲིད་ཀྱི་གནས་བབ་ཐོག་ནས་ཞི་བདེ་ཡོངས་ཐབས་དང་། ཨེ་ཤི་ཡའི་ནང་ཞི་བདེ་ཡོང་བའི་གནད་འགག གཞན་ཡང་ཧི་མ་ལ་ཡའི་རི་བརྒྱུད་ལ་མཚོན་ན་ཡང་ཕྱི་ལོ་༡༩༥༩ གོང་དུ་བོད་དུ་ནང་ཆོས་ལ་སློབ་སྦྱོང་བྱེད་དུ་ཕྱིན་ནས་མར་ལོག་པའི་གནས་བབ་དང་། དུས་འགྱུར་གྱི་རྗེས་སུ་བཙན་བྱོལ་དུ་གནས་པའི་རིང་ལ་ཡང་ཧི་མ་ལ་ཡའི་རི་བརྒྱུད་ནས་བོད་ཀྱི་ཆོས་སྡེ་ཁག་ཏུ་སློབ་གཉེར་ལ་འགྲོ་མཁན་མང་པོ་ཡོད་པའི་གནས་བབ་ཡོད་པ། བཙན་བྱོལ་གྱི་སློབ་གྲྭ་ཁག་ལ་ཡང་ཧི་མ་ལ་ཡའི་རི་བརྒྱུད་ཀྱི་སློབ་ཕྲུག་མང་པོ་ཡོད་པ་དེར་བཀའ་དྲིན་རྗེས་དྲན་ཞུ་རྒྱུའི་གནད་འགག་ཆགས་ཡོད་སྟབས། དེ་འདྲའི་གནས་སྟངས་ཀྱི་ཐོག་ནས་༧གོང་ས་སྐྱབས་མགོན་ཆེན་པོ་མཆོག་ནི་བོད་མི་ཙམ་མ་ཡིན་པར་ཧི་མ་ལ་ཡའི་རི་བརྒྱུད་ཡོངས་སུ་རྫོགས་པར་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་དངོས་དང་། ཚེ་འདི་གཉིས་ཀྱི་༧སྐྱབས་གནས་ཡིན་པའི་གནས་བབ་གཅིག་པ་ཡིན་དུས། བོད་ཀྱི་བདེན་དོན་ཐོག་༧གོང་ས་སྐྱབས་མགོན་ཆེན་པོ་མཆོག་སླར་ཡང་བོད་དུ་ཆིབས་སྒྱུར་གནང་རྒྱུར་རྒྱབ་སྐྱོར་དང་། དེའི་ཐོག་བདེན་དོན་འཐབ་རྩོད་བྱ་རྒྱུར་དུས་ནམ་ཡང་ལྷོད་པ་མེད་པ་བྱ་རྒྱུ་ཡིན་སྐོར་སོགས་བརྗོད་སོང་།