19
Sun, May
28 New Articles

༸གོང་ས་མཆོག་དང་རྒྱ་རིག་ཚན་རིག་པས་ཐེངས་དང་པོ་ཚད་རྡུལ་དངོས་ཁམས་དང་འབྲེལ་བའི་བགྲོ་གླེང་ཚོགས་པ

ཚན་རིག་ཤེས་བྱ།
Typography

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཆོས་ལུགས་གཙོ་ཆེ་བ་ཚང་མས་བྱམས་པ་དང་བརྩེ་བ་སོགས་ཀྱི་བསླབ་བྱ་གསུང་བཞིན་ཡོད། དེར་བརྟེན་དེང་དུས་ཤེས་ཡོན་ལམ་ལུགས་ནང་ང་ཚོས་ལུས་པོའི་འཕྲོད་བསྟེན་བྱེད་པ་ལྟར་བསམ་བློའི་འཕྲོད་བསྟེན་སྐོར་སློབ་གསོ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་ཚད་རྡུལ་དངོས་ཁམས་དང་འབྲེལ་བའི་བགྲོ་གླེང་ཐོག་གསུངས་འདུག

དེ་ཡང་༢༠༡༨ལོའི་ཟླ་ ༡༡ཚེས་་༡ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཏཱ་ལའི་བླ་མ་ཐེབས་རྩའི་གོ་སྒྲིག་འོག་རྒྱ་རིགས་ནོ་བེལ་གཟེགས་རྟགས་བཞེས་མཁན་སློབ་དཔོན་ཆེན་མོ་ཡོན་ཚི་ལི་དང་གཞན་ཚན་རིག་པ་ཁ་ཅིག་བཅས་ནས་ཚད་རྡུལ་དངོས་ཁམས་དང་འབྲེལ་བའི་བགྲོ་གླེང་ཚོགས་འདུག་པ་དང་། དེའི་ཐོག་ཏུ་རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག་དང་། ༸སྐུའི་གསུང་སྒྱུར་ཐུབ་བསྟན་སྦྱིན་པ་ལགས། རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། རྫས་སྦྱོར་རིག་པའི་ཐོག་ནོ་བེལ་གཟེངས་རྟགས་བཞེས་མཁན་ཐེ་ཝན་གྱི་མི་རིགས་ཐོག་མ་སློབ་དཔོན་ཆེན་མོ་ཡོན་ཚི་ལི་ལགས་ཀྱིས་གཙོས་ཐེ་ཝན་ནས་རྒྱ་རིགས་ཚད་རྡུལ་དངོས་ཁམས་རིག་པའི་ཚན་རིག་པ་དང་ཉམས་ཞིབ་པ། གཙུག་ལག་སློབ་དཔོན་སོགས་ཁྱོན་རྒྱ་རིགས་མི་གྲངས་ལྔ་བཅུ་དང་། དེ་བཞིན་དབུས་སྨན་རྩིས་ཁང་དང་། རིག་ལམ་སློབ་གཉེར་ཁང་། ས་རཱ་མཐོ་སློབ། བོད་ཀྱི་དཔེ་མཛོད་ཁང་། གཏོང་ལེན་བཅས་སོགས་ནས་ཚོགས་བཅར་བ་མི་གྲངས་ ༡༨༦ གཞན་ཡང་ཟུར་ཉན་དུ་བོད་མི་སེར་སྐྱ་ཕོ་མོ་བཅས་ཁྱོན་མི་གྲངས་ ༣༠༠ ཙམ་བཅས་བགྲོ་གླེང་ཐོག་ཕེབས་འདུག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་ནས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བཀའ་དྲིན་བསྐྱངས་ཏེ་འཚམས་འདྲི་དང་འབྲེལ་བཀའ་སློབ་བསྩལ་དོན། ཐེ་ཝན་ནས་ཕེབས་པའི་རྒྱ་རིགས་ཚན་རིག་པ་དང་མཉམ་དུ་འདི་ལྟ་བུའི་བགྲོ་གླེང་ཚོགས་འདུ་ཚོགས་པ་ཕལ་ཆེར་ཐེངས་དང་པོ་ཡིན། ཚན་རིག་པ་མང་པོ་དང་ལྷན་འདི་ལྟ་བུའི་ཚོགས་འདུ་ལོ་ ༣༠ ཙམ་གྱི་སྔོན་ནས་གོ་བསྡུར་བྱེད་རྒྱུ་བྱུང་། ལྷག་པར་ཨ་རི་དང་ཡུ་རོབ་སོགས་ནུབ་ཕྱོགས་ཀྱི་ཚན་རིག་པ་དང་མཉམ་དུ་བགྲོ་གླེང་བྱེད་རྒྱུ་བྱུང་།

ངོས་ཀྱིས་འདི་ལྟ་བུའི་ཚོགས་འདུ་ཚོགས་དགོས་དོན་གཙོ་བོ་གཉིས་ཡོད། དང་པོ་ནི། ཚན་རིག་ཤེས་བྱའི་གནས་ལ་གོ་རྟོགས་ཡར་རྒྱས་གཏོང་ཆེད་སྤྱི་དང་། བྱེ་བྲག་ཏུ་ཚན་རིག་པས་ཉམས་ཞིབ་བྱས་པ་དཔེར་ན། དུས་རབས་ ༢༠ མཇུག་ཏུ་མི་མང་ཆེ་བས་ཕྱི་དངོས་པོར་དོ་སྣང་ཆེ་བ་བྱས་པ་མ་གཏོགས་ངོས་ཀྱིས་ཤེས་པ་ཞེས་སྐོར་འགྲེལ་བཤད་རྒྱག་དུས་ཁ་ཤས་ཀྱིས་ཀླད་པ་མ་གཏོགས་ཤེས་པ་ཡོད་མ་རེད་ཅེས་ཟེར་གྱི་འདུག ཚན་རིག་པ་མང་པོ་ཞིག་གིས་ཕྱི་དངོས་པོ་ཙམ་ལ་ཉམས་ཞིབ་བྱས་པ་དེས་འདང་གི་མི་འདུག བདེ་སྡུག་གི་ཚོར་བ་ཁོང་ཁྲོ་དང་། སྙིང་རྗེ་དེ་དག་ནི་ཀླད་པའི་བྱེད་ལས་ཙམ་མིན་པར་ཤེས་པར་རག་ལུས་ཡོད། དེར་བརྟེན་ཚན་རིག་པ་ཚོས་ཉམས་ཞིབ་གནང་རྒྱུའི་སློབ་ཚན་ནང་ཤེས་པའི་སྐོར་ཉམས་ཞིབ་བྱ་རྒྱུ་དེ་འཇོག་དགོས། དཔེར་ན་ཨ་རི་ནས་ཡིན་པའི་ཀླད་རྩའི་ཚན་རིག་པ་མཁས་པ་ཞིག་གིས་སེམས་ཕྲ་མོའི་སྐོར་རྟགས་མཚན་དེ་འདྲ་སྟོན་གྱི་འདུག དཔེར་ན་ཀླད་པ་ཤི་ཟིན་པ་དང་སྙིང་གི་ལས་ཀ་བྱེད་རྒྱུ་མཚམས་བཞག་ཡིན་ནའང་ལུས་པོའི་དྲོད་མ་ཡལ་བར་གསོན་པོ་སྡོད་མཁན་འདུག དཔེར་ན་ངོས་ཀྱི་དགེ་རྒན་ལྟ་བུར་ཆ་བཞག་ན་སྨན་པས་ངོས་ནས་འདས་གྲོངས་སུ་གྱུར་ཟིན་སྐོར་གསུང་གི་འདུག འོན་ཀྱང་ཁོང་གི་ལུས་པོ་ཉིན་གྲངས་ ༡༣ རིང་དྲི་མ་མེད་པར་གནས་ཡོད། དེ་ལྟ་བུར་ཁ་ཤས་བདུན་ཕྲག་གཉིས་རིང་དང་། ཁ་ཤས་བདུན་ཕྲག་གསུམ་རིང་ཕུང་པོ་རྙིང་པ་མ་ཆགས་པར་སོས་པ་བྱས་ནས་བསྡད་པ་དེ་འདྲ་ཡོང་བཞིན་ཡོད། ནང་པའི་ལྟ་གྲུབ་ཐོག་ནས་ཞུས་པ་ཡིན་ན་འགྲེལ་བཤད་ཡོད་ཀྱང་ཚན་རིག་པའི་ངོས་ནས་ད་ལྟའི་ཆར་འདི་ལྟ་བུའི་གནས་ཚུལ་ལ་དམིགས་བསལ་འགྲེལ་བཤད་མེད། ཨ་རིའི་ཝི་སི་ཀོན་སིན་ Wisconsin སློབ་གྲྭ་ཆེན་མོའི་ནང་ཕྱག་ལས་གནང་མཁན་དབང་རྩའི་ཚན་རིག་པ་རི་ཆཌ་ཌེ་ཝི་ཌི་སན་ Richard Davidson ལགས་ཀྱིས་མི་འདས་གྲོངས་སུ་གྱུར་རྗེས་ཕུང་པོར་དྲི་མ་མེད་པར་སོས་ཉམས་ལྡན་པར་གནས་པ་དེ་འདྲའི་སྐོར་ཉམས་ཞིབ་བྱེད་རྒྱུའི་ལས་འཆར་ཞིག་འགོ་བརྩམས་ཡོད། ང་ཚོ་འདིར་འཛོམས་དགོས་པའི་དམིགས་ཡུལ་དང་པོ་དེ་འདི་ཡིན།

གཉིས་པ་ནི། ཕྱི་དངོས་པོ་ཡར་རྒྱས་ཧ་ཅང་ཕྱིན་ཡོད། འཕྲུལ་ཆས་དང་ཚན་རིག་ཧ་ཅང་ཡར་རྒྱས་ཕྱིན་པ་དང་མཉམ་དུ་དཔལ་འབྱོར་ཡར་རྒྱས་འགྲོ་རྒྱུ་སོགས་ཧ་ཅང་ཡར་རྒྱས་ཕྱིན་ཡོད་པ་དེ་དག་བེད་སྤྱོད་ཧ་ཅང་ཡོད། ཚན་རིག་པས་བརྟག་དཔྱད་བྱས་པ་བརྒྱུད་དུས་རྟག་ཏུ་ཞེ་སྡང་དང་། ང་རྒྱལ། དེ་བཞིན་འཇིགས་སྣང་འོག་གནས་པ་ཡིན་ན་ལུས་པོའི་ནང་ནད་སྔོན་འགོག་བྱེད་མཁན་ལུས་ཟུངས་མ་ལག་ immune systems ཉམས་རྒུད་དུ་ཕྱིན་ནས་ལུས་པོ་རང་བཞིན་གྱིས་ཉམས་རྒུད་འགྲོ་བ་དང་། ནད་ན་ཚ་ཕོག་སླ་པོ་ཆགས་ཀྱི་ཡོད་པ་ཤོད་ཀྱི་འདུག དེ་ལས་ལྡོག་སྟེ་གལ་ཏེ་གཞན་ལ་བྱམས་བརྩེ་སྤེལ་བ་ཡིན་ན་སྙིང་སྟོབས་འཕེལ་ཞིང་སེམས་ནང་ཞི་བདེ་སླེབ་རྒྱུ་དང་། དེར་བརྟེན་ལུས་པོའི་འཕྲོད་བསྟེན་ཡང་བདེ་ཐང་ཡོང་ཐུབ་བཞིན་ཡོད།

འཛམ་གླིང་ནང་ཆོས་ལུགས་གཙོ་ཆེ་བ་ཚང་མས་བྱམས་པ་དང་བརྩེ་བ་སོགས་ཀྱི་བསླབ་བྱ་གསུང་བཞིན་ཡོད། དེར་བརྟེན་དེང་དུས་ཤེས་ཡོན་ལམ་ལུགས་ནང་ང་ཚོས་ལུས་པོའི་འཕྲོད་བསྟེན་བྱེད་པ་ལྟར་བསམ་བློའི་འཕྲོད་བསྟེན་སྐོར་སློབ་གསོ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཚན་རིག་པ་ཁག་གཅིག་གིས་འགྲོ་བ་མིའི་ལྷན་སྐྱེས་རང་བཞིན་ནི་བྱམས་བརྩེ་ལྡན་པ་རེད། ཅེས་བརྟག་དཔྱད་བྱས་པ་བརྒྱུད་ར་སྤྲོད་ཐུབ་པ་བྱུང་ཡོད། འཛམ་གླིང་ནང་མི་འབོར་ཐེར་འབུམ་བདུན་ཡོད་པ་ཚང་མ་མའི་མངལ་ནས་སྐྱེས་པ་ཤ་སྟག་ཡིན་པ་མ་ཟད། མའི་བྱམས་སྐྱོང་འོག་ནས་འཚར་ལོངས་བྱུང་བ་གཅིག་མཚུངས་རེད། ཕྲུ་གུ་ཆུང་དུས་སྐབས་དབུལ་ཕྱུག་དང་། ཆོས་དད་ཡོད་མེད། ཆོས་ལུགས་གང་ཡིན། མི་རིགས་གང་ཡིན་སོགས་ལ་དོ་སྣང་རྩ་བ་ནས་མ་བྱེད་པར་ཕན་ཚུན་འཆམ་མཐུན་ངང་འཚོ་བཞིན་ཡོད། དེང་དུས་ཤེས་ཡོན་ལམ་ལུགས་ནང་ཕྱི་དངོས་པོ་ཙམ་ལས་ནང་གཤིས་རྒྱུད་དང་འབྲེལ་བའི་བཟང་པོའི་རིན་ཐང་སྐོར་ལ་དོ་སྣང་དེ་ཙམ་བྱེད་ཀྱི་མེད། འཛམ་གླིང་འདིར་མི་འབོར་ཐེར་འབུམ་བདུན་ཡོད། དེའི་ཁོངས་ནས་ཆོས་དད་མེད་མཁན་མི་གྲངས་ཐེར་འབུམ་གཅིག་ཙམ་ཡོད། འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་གྱི་སྡེ་ཚན་གཉིས་ཡོད། དཔེར་ན་ང་ཚོས་སྨན་གཅིག་ཡར་བླངས་ནས་སྨན་འདི་ཡག་ཤོས་རེད་ཅེས་ནམ་ཡང་བརྗོད་མི་ཐུབ། ནད་པའི་ལུས་པོའི་གནས་བབ་དང་ནད་ཀྱི་རང་བཞིན་སོགས་དང་བསྟུན་ནས་སྨན་འདི་ཡག་ཤོས་རེད་ཅེས་བརྗོད་ཆོག་པ་ལྟར། འགྲོ་བ་མི་ལ་ཁམས་དང་མོས་པ་སྣ་ཚོགས་ཡོད་པར་བརྟེན། རང་རང་སོ་སོའི་ཁམས་དང་མོས་པར་གཞིགས་པའི་ཆོས་ལུགས་སྣ་ཚོགས་ཡོད། ཆོས་ལུགས་བྱེ་བྲག་པ་གཅིག་ལ་མཛུབ་མོ་བཙུགས་ནས་ཆོས་ལུགས་འདི་ཡག་ཤོས་རེད་ཅེས་ནམ་ཡང་བརྗོད་མི་ཐུབ། ཅེས་སོགས་ཀྱི་བཀའ་སློབ་སྩལ། །

 

གསལ་བསྒྲགས་ཀྱི་ས་མིག